KHAWTHLIR

Education Fair
MZP headquarters, Lung­lei chuan nimin khan Saikuti Hall-ah Education Fair an buatsaih a, Lung­lei district MJA president H Lalthansanga'n a hawng. H Lalthansanga chuan, Fair chu zirlaite'n ṭangkai takin hmang se a duh thu sawiin, duhsak-na a hlan.

Jubilee lawm
Khumtung khuaa Democratic High School chuan nimin khan an kum 50-na, golden jubilee an lawm a, minister Lal Thanzara leh bialtu MLA Lalrinawma ten an hmanpui. Inkhawmah hian jubilee puala souvenir buatsaih tlangzarh a ni a, tlaiah ruai an ṭheh a ni.

Pangang no sem
Sericulture department chuan, nimin khan Chhingchhip biala pangang khawitute hnenah pangang notê (Chowki-worms) an sem. Inkhawm­a tarlan danin, pangang note sem chhuah hi Karnataka aṭanga lak luh a ni a; tun hma chuan a tuia sem ṭhin a ni a, tunah chuan mithiamte'n a têt laiin an vulh phawt a, a len deuh hnuah a khawitute hnenah an pe chhuak ṭhin a ni.

Officer sawn
Mizoram sorkar chuan nimin khan notification ti chhuakin Kolasib DC R Zarzosanga chu Higher & Technical Education Director-ah a sawn a, special secretary ni lai Dr. Arun T chu Kolasib DC-ah sawn a ni thung.

MNC result chhuak
Mizoram Nursing Council chuan April 17, 2018 khan March 2018-a GNM, ANM leh health worker exam result a tichhuak. GNM internship exam-ah mi 87 an pass vek a, first year-ah zirlai 76 zinga 55, 2nd. year-ah zirlai 40 zinga 25 leh 3rd. year-ah zirlai 10 an pass. Health worker exam-ah chuan 1st. year-ah mi 23 zinga 18 leh 2nd. year-ah mi 12 zinga 10 an pass a ni.