Two wheeler taxi permit kan pe tawh dawn lo ; Aizawl tan taxi permit kan pe tawh lo - Transport Minister

Transport minister John Ro­tluangliana chuan, Aizawl khawpui chhung atan taxi permit pek chhuah a nih tawh loh thu leh, two wheeler taxi permit pawh pek a nih tawh dawn loh thu a sawi.

Aizawl City Bus Owners' Association (ACBOA)-in ni­mina Kulikawn YMA Hall-a conference an hman a hman­pui­naah Transport Minister chuan, "Two wheeler taxi a pun chak êm avang leh traffic a tihtâwt belhchhah loh nan license pek theih chin siam a ni a, tiam chin 500 pek chhuah tawh a ni a, license pek chhuah a ni tawh dawn lo," a ti a; license neitu zinga hun tiam chhunga lirthei nei hman lote an awm chuan chu'ng mite chan-ái erawh dil theih a nih tur thu a sawi.

John Rotluangliana chuan, Aizawl khawpui bikah taxi permit pek a nih tawh loh thu sawiin, "MZ-09 registration hmangin DTO (Rural) kaltlang erawh chuan Aizawl páwn lam, Aizawl district chhunga tlân turin taxi permit pek a ni. Auto-rickshaw, Aizawl khaw chhehvela service tir pawh a pun chak em avangin license pek chhuah theih chin a thleng leh ṭêp. Khawpui chhunga lirthei tâwt lutuk tihtlem nan sorkar a khauh hle a ni," a ti.

Aizawl khawpuia bus tlan chu Aizawl khawpui cheitu a nih bakah, Mizo hnam darthlalang a nihna chen a awm tih sawiin Rotluangliana chuan, "Bus ser­vice tir chungchangah a neitute pawhin an hamṭhatna ngawt thlir lo a, kan vai tana ṭhatna tur an hmuh thiam ve a ngai," a ti a; city bus neitute chu bus fare chungchangah mipui sum dinhmun ngaichâng phawt tur leh tihdanglam tum rih lo turin a ngen.

Transport Minister chuan, city bus kum 10 tlân tawhte thlak tura sorkarin thupek a chhuah chu bus neitute thurâwn anga siam a nih thu a sawi a, "An duh leh tâk loh avangin an thurâwn ang bawkin kum 15-ah pawhsei a ni. City bus-te chu fitness-ah MVI-te'n la tlân thei tura ṭha tâwk an tih phawt chuan kum 15 tlan tawh pawh an tlan chhunzawm sorkar chuan a remti a, MVI fitness test erawh paltlang a ngai a ni," a ti.

ACBOA inkhawmpuia session hnihna leh session thumna chu hruaitu thlanna atan leh rorelna atan hman a ni.