Politics hi Pathian rawng­­bawlnaah ngaih tur - H Liansailova

Congress party trea­surer H Liansailova chuan, political party tina mite'n politics chu Pathian rawngbawlnaah ngai se a duh thu a sawi a, "Politics-ah hian fimkhur taka nun a ṭul a, Pathian rawngbawlnaa ngaih tur a ni," a ti.

Aizawl West-I Block Congress-in nimina Sai­ranga political training an buatsaih a hmanpuinaah H Liansailova chuan, "Kan ram poltical history kal tawhah insawichhiatna leh inpumawhna hi hmanrua berah hman a ni ṭhin. Hetiang inbeihna hi a tlahniam tial tial a ni," a ti a; politics-a thil tih apiang chu Pathian rawngbawlnaah ngaih tur a nih thu a sawi.

MPCC Treasurer chuan, mipuite'n politics an hmuh thianghlimna atan politician-te'n an nun an hman uluk a ṭul thu a sawi a, "Politician-te chuan miin fel famkima min hmu lo a nih pawhin, Pathian a ṭih a ni tih an hriat tura nun a pawimawh," a ti.

Sorkar laipuia Cong­ress hruaitute'n 'Save the Constitution Campaign' kalpui an tum tih sawiin Liansailova chuan, "Kan Constitution hi Kristianna zirtirna êng aṭanga duan a ni a, hnam tênau leh sakhua humhimna tur ngaihtuah a ni," a ti a; Indian Constitution-in intluktlanna a ngaih pawimawh avangin RSS leh an thurualpuite'n a tîr aṭangin an pawm theih loh thu a sawi.

H Liansailova chuan, Constitution chu RSS-te'n tihdanglam duh viau ṭhin mah se, sorkar laipuia Cong­ress an sorkar ṭhin avangin an duh angin an che theih lo niin a sawi a, "BJP sorkar hnuah RSS duh danin thil a kal emaw tih mai turin a awm. RSS chuan India hi Hindu ramah siam an tum a ni," a ti.

MPCC Communi­cation department chair­man PC Laltlansanga chuan, kumina MLA in­thlan awm turah party tinin sorkarna siam an tum leh dawn tih sawiin, "MNF hian hruaitu thar an nei a, CM candidate tur eirûkna laka hminghliauna nei lo an nei a nih loh chuan an tan chance a awm lo," a ti a; hruaitu thar an neih loh chuan MNF hmabak chu vote chhiar zana EVM complaint tura inrin leh niin a sawi.

PC Laltlansanga chuan, MNF-a a awm laiin SEDP duannaah a tel ve thu sawiin, "Cheng nuai 3 sem tur an tih hi hotupa ber pawhin khawi aṭanga sem tur nge a hre lo. Nuai 3 kan sem dawn a ṭhenin an ti a, a ṭhenin sem dawn lo an ti. SEDP buah cheng nuai 3 sem tur thu tarlan a ni lo," a ti.