KHAWTHLIR

Nimin khan Lunglei College NSS unit chuan an college hall-ah thisen pek rûnpui an huaihawt a, Civil Hospital, Lunglei tan mipa 40 leh hmeichhia 10-te'n thisen unit 50 an pe. KṬP, Sihphir Branch pawhin Synod Hospital blood bank-ah thisen unit 18 an pe a, a petute mipa 16 leh hmeichhia pahnih an ni.

MNF MLA 12-te'n MLA aṭanga ZPM Legislature Party leader Lalduhoma a ban theihna atana Assembly Speaker hnenah an hêk chungchanga thutlukna chu vawiin chawhma dar 11 hian Assembly speaker Lalrinliana Sailo-in a puang dawn. Thutlukna puanna hi Doordarshan Kendra, ZONET leh LPS-ahte live telecast-a tihchhuah a ni ang.

C Lalhluna lehkhabu ziah, 'Duhlian ṭawng, Mizo ṭawng' tih chu nimin khan School Education minister Lalchhandama Ralte-in a pisaah a tlangzarh. Minister chuan, Zo hnahthlak hnam hrang hrangte ṭawng vanga an inchemhàr lek lek laite a awm tih sawiin, "Zo hnahthlakte hi tlemin danglamna awm hret hret mah se, inpawm tawn a, rorelna pakhat hnuaia kan awm theih hun tur ngaihtuah a ngai," a ti.

Nimin khan State Referral Hospital-ah Covid-19 vei mi pahnih dah luh thar an ni a, anni nen SRH-ah hripui vei mi 29 enkawl mek an ni. SRH-ZMC Bulletin tarlan danin, Mi 29 zinga mi pakhat chu ICU-ah awmin, oxygen pek a ni a; mi dang zawng ward-ah an awm. SRH-a enkawl mek zinga mi panga chu kum 60 chung lam an ni.

Union minister Kiren Rijiju chu Mizoramah rawn zinin a chám mek a, LADC-a MDC inthlanpuiah an party (BJP) tan a campaign dawn nia thu dawn a ni. Union Sports minister Kiren Rijiju hian November 25, Nilaini khan Lengpui Airport a thleng a, airport-ah Mizoram Sports minister Robert Romawia Royte nen an inkâwm. Nilaini vêk khan Sangau a pan a ni.