Magnetic Mizoram Investors Summit ṭan

Magnetic Mizoram Investors Summit chu nimin khan Convention Centre, Beraw­tlangah ṭan a ni a, vawiinah chhunzawm a ni ang. Summit hawngtu, chief minister Lal Thanhawla chuan, Mizoram chu market economy-ah siam an tum thu a sawi.

Chief Minister chuan, Mizoram chu hun rei tak ram dang hriat tura pho chhuah a nih ngai loh thu sawiin, "Kan state-in theihna a neihte hi khawvel hriatah pho chhuah a ṭul. Mumbai, Kolkata leh Delhi-ahte Magnetic Mizoram Road Show buatsaih a ni tawh a, investor liante koh luh a nih theihna atan buatsaih a ni," a ti.

Magnetic Mizorama sawihona hrang hrangte chu hman ṭangkai a nih ngei a beisei thu sawiin CM Hawla chuan, "Mizoram hian sector hrang hrangah theihna tam tak a nei a, chumi chu hman ṭangkai a ngai. Mizoram hi ei ṭâwk ṭâwk economy aṭangin market economy-ah siam kan tum," a ti a; investor-te chu Mizoramin theihna a neihte hmang ṭangkai turin a sáwm.

Mizoram chu mau tâm ṭhinna hmun a nih thu sawiin Lal Thanhawla chuan, "India ram puma mau awm zawng zawng zinga 40% chu Mizorama awm a ni. Mizoram pumpui zinga 30% vel chu mau hmun a ni a, mau chi hrang hrang 36 kan nei. Hengte hi hman ṭangkai kan tum a, mau sâwngbâwl kawnga thiamna nei state páwn mite pawh sàwm an ni tawh," a ti.

Chief Minister chuan, ni zungchakna (solar energy) lamah Mizoramin hma a sawn theih nan hmalak mek a nih thu sawiin, "Megawatt 25 pe thei tur solar energy bun tum a ni a, megawatt 20-25 pe chhuak thei tur hmun hrang hrangah bun tum a ni. Kolkata-a Magnetic Road Show kan neih ṭumin Kolkata-a company pakhat chuan Mizoramah megawatt 100 pe chhuak thei solar power plant bun an duh thu min hrilh," a ti a; megawatt 100 chuan ram a duh zau dawn avangin Kolkata company-te chu megawatt 50 pe thei buntir tum a nih thu a sawi.

Ṭhenawm ramte nena insumdawn tawnna tur buaipui mek a nih thu sawiin CM Hawla chuan, "Myanmar leh Bangladesh nena insumdawnna ṭha zawka kalpui a nih theihna atan theihtawp chhuah mek a ni. Myanmar lamin an ram chhung kawngte an siam theih loh avangin a siamna tur prime minister Narendra Modi-a'n a pe a ni," a ti.

Chief Minister sawi danin, Mizoram chu Asia chhimchhak ramte nena insumdawn tawnnaa hmun pawimawha siam tum a ni a, chuta tan chuan Mizoram chhim lamah airport siam tura ruahman mek a ni. MADC huam chhungah airport siam tum a ni a, DPR peih tawh niin, sorkar laipui pawhin a thuphungin airport siam a remti tawh.

Finance minister Lalsawta chuan, ei leh bara hmasawnnaah Mizoramin bung thar a kaia an hriat thu sawiin, "Mizoram hian theihna tam tak a nei. Khawvela sik leh sa ṭha ber a ni a, Mizoram khawi hmunah pawh Mizo ṭawng a hman theih a, remna leh muanna ṭha tak kan nei a ni," a ti a; Mizoramin theihna a neihte chu hmang ṭangkai turin investor-te a sáwm.

DoNER secretary Naveen Verma pawhin thu sawiin, "Mizorama thil awm, hmun danga awm ve lote pho chhuak thiam ula, mi in hîp thei ang. Khualzin hîp turin theihna in nei. Film tourism atan pawh Mizoram hi hmun ṭha tak a ni a, film siamtute hîp turin hma la ula, film an rawn chang duh ngei ang. Mau in ngah a, mau hi thil hrang hrangah ṭangkai taka hman theih a ni a, hman ṭangkai tum rawh u," a ti.

Magnetic Mizoram Investors Summit hawnna inkhawmah hian Summit buatsaih a nih theihna atana sûlsutute zinga mi, Magnetic Mizoram CEO Capt. Rahul Bali, Planning secretary Dr C Vanlalramsanga leh Ministry of External Affairs-a OSD MLK Raja-te pawhin thu an sawi.

Summit-ah hian technical session ṭum thum buatsaih a ni a, Mizoram, ram chhung leh ram páwna thiamna hrang hrang neite'n thu an sawi a, chu'ng zingah chuan Kolkata-a German consul general Dr Michael Feiner leh Russia deputy consul general Dr Mikhail Gusav-te pawh an tel. Mithiamte thusawi hrang hrangte chu sawiho zel a ni.