Sorkar hnathawkten Civil Service Day hmang

Nimin khan Mizoram hmun hrang hrangah sorkar hnathawkte'n Civil Service Day, 2018 an hmang. Aizawlah chuan Administrative Training Institute (ATI) auditorium-ah hman a ni a, chief secretary mawhphurhna la mektu Lalnunmawia Chuaungo khuallian a ni.

Lalnunmawia Chuau­ngo chuan, Civil Ser­vices Day-ah sorkar hna­thawkte chu ram leh mi­puite tana thawk an ni tih inhre thar turin a chah a, "Sorkar hnathawkte hi ram inrelbawlna lungthu tikimtu leh sorkarin mipui tana hna a thawh theihna kutke pawimawh ber zinga mi an ni," a ti.

Politician-te chu kum nga dana exam hma­chhawn ṭhin leh a taka hna thawk tura an hnuaia sorkar hnathawkte ma­mawhte an nih thu sawiin Lalnunmawia chuan, "Sorkar hnathawkte chu dan bawhchhiatna lian tham an neih loh chuan an pension thlenga chhawr an ni ṭhin," a ti a; sorkar hnathawkte chuan mipui hamṭhatna atan thawk tura hlawh nei an nih tih an chian fo a ngaih thu a sawi.

Lalnunmawia Chuau­ngo chuan, sorkar hna­thawkte'n mipui náwlpui hamṭhatna atana thawk an ni tih theihnghilh a, mahni tana hna thawk rilru an an put chuan sorkarna ṭha a awm thei lo tih a sawi a, "Eizawnna ngêlnghet neite chuan an kumhlunna chu huaisenna petu, dikna nena hna thawh tumna bakah, langtlang sorkar siam duhna rilru an neih nan hmang se, ram leh mi­puiin an chhawr ṭang­kai zual zawk ang," a ti.

Civil Service Day hi ATI director Dr Ankita Chakravarty-i'n a kaihruai a; thupui, 'Corruption in Government: Improving Transparency and Probity in Public Life' tih chu accountant general HK Dharmadarshi, IGP (Intelligence) LH Shanliana leh Rualzakhuma, IAS (Rtd)-te kaih­hruainain sawiho a ni.

Inkhawmah hian Mi­zoram sorkara depart­ment hrang hrang leh district tinte’n an hna­thawh ṭhat dan tehna Results Frame­work Document-a ti ṭha top 10-te hnenah Certifi­cate of Appre­ciation hlan a ni a; pakhatna chu Food, Civil Supply & Consumer Affairs department niin, Coo­­peration leh GAD-te chu pahnihna leh pathumna an ni.