MZP-in dan loa Chakma khaw din chungchangah June 2018 ral hmaa hma la turin sorkar phût

MZP chuan, dan loa Chakma khaw dinte chungchangah June 30, 2018 ral hmaa dan anga hma la turin Mizoram sorkar an phût a, "Hmalakna a awm lo a nih chuan Mizo ṭhalaite'n a ṭul angin hma kan la dawn," an ti.

MZP hruaitute hian nimin khan Aizawl Press Club-ah thuthar thehdarhtute an kâwm a; MZP president L Ramdinliana Renthlei chuan, Mizoramah Chakma an pung chak a, kum 1901 chhiarpuiah mi 198 chiah an awm laiin, tunah chuan 1,50,000 vel an awm tawh tih sawiin, Chakma-te pun chak dan chu inthlan pun dan pangngai a ni thei lo a, Bangladesh aṭangin mi tam tak dan loin an lut ru ngei niin a sawi.

MZP President sawi danin, kum 2013-a RTI Act hmanga an zawhna Local Administration Department (LAD)-in an chhan dan chuan, dan loa Chakma khaw din 23 a awm a, chu'ng khuaah chuan in 999 awmin, mi 4,707 an chêng.

Kumin 2018-ah RTI Act hmangin zawhna an zawt leh a; LAD-in an chhan dan chuan, dan loa Chakma khaw din 14 a awm a, chu'ng kuhaahte chuan in 691 awmin, mi 3,384 an cheng. Dan loa Bru khaw din pakhat a awm bawk a, chutah chuan in 56 awmin, mi 376 an chêng a ni.

Kum 2013-a LAD an zawhnaah dan loa Chakma khaw din 23 a awm a, kum 2018-a an zawh lehnaah chuan dan loa khaw din 14 chiah a awm tawh. Zawhna chhangin MZP President chuan, LAD-in kum 2013-a dan loa khaw din an tarlan zinga kum 2018-a lang ta lote chu tunah pawh a la awm ngeia an hriat thu a sawi.

'Mizorama dan loa khaw din/unauthorized-te hi sorkarin engtin nge tih a tum? Hmalakna a nei em? Hmalakna a neih chuan engtin nge hma a lo lak tawh?' tia an zawhna chu LAD chuan, 'State level Coordination Committee a awm a. District tinah District Level Committee on Unauthorized Settlement din a ni bawk. Heng hian Unauthorized Settlement-te dinhmun an enfiah ṭhin,' tiin an chhang. Hemi chungchangah hian MZP President chuan, "State Level Coordination Committee leh District Level Committee on Unauthorized Settlement-te hian an ngaihtuah miah lo niin kan hria," a ti.

L Ramdinliana chuan, MZP-in Chakma zawng zawng an haw lo a, dan loa Mizorama lut foreigner leh Mizote chanvo chuhpuitute an hua tih a sawi a, "Kan rama lo lut foreigner-te chunga action lak a nih theih nan nasa lehzuala hmalak kan tum mek a ni," a ti a; Chakma foreigner-te dapchhuah an nih theih nan leh dan anga an chunga hma la turin sorkar laipui leh Mizoram sorkar an ngen tak zet tih a sawi.

Chakma Autonomuos District Council (CADC) chhungah Zo hnah­thlak khua pathum a awm tih sawi­in MZP President chuan, chu'ng khaw pathumte chu CADC sorkarin nasa takin an hrûk niin a sawi a, "Mizo khaw pathumte hian CADC aṭanga an dawn tur ang an dawng lo reng a nih chuan Mizo ṭhalaite kan pên chhuak dawn," a ti.

CADC chhung khaw eng emaw zatah Kristiante hmuhsitna leh vauna a nasa nia sawiin Ramdinliana chuan, "CADC area-ah Mizo tan in leh lo neih theih a ni lo a, kan missionary-te'n biak-in leh quarters atana ram an hawh pawh hnawk an ti tawh hle a ni," a ti a; Chakma Kristiante chu a theihna apiangah an hrêk thu leh Kurbalasora-ah phei chuan missionary-te in an luahtir duh lo niin an sawi.