Zoramthanga'n 'Vibrant Chakma Nation' Banner an hriatpui loh thu a sawi nawn

MNF president chuan tun hnaia Chawngte a tlawh ṭuma MNF-in 'Vibrant Chakma Nation' din a tiamna thuziak (banner) chu an hriatpui loh thu leh Chakma MNF-te'n anmahni thua an târ a nih thu a sawi nawn. Congress party president Lal Thanhawla chu thu dik zawk lang leh mai turah chuan thu dik lo sawi lo turin a chah bawk.

Zoramthanga hian nimina Mizo Hnam Runa inkhawmah thu sawiin, Chawngte-a MNF banner, 'Vibrant Chakma Nation' tih inziak chungchang a sawifiah a, 'Vibrant Chakma Nation' tih banner intár chu a hun laiin a hmu lo niin a sawi.

Zoramthanga chuan, "Hnam Rûn kawtah mipui tam takin kal pawh kal hleih theih loin min lo bâwr a, Hnam Run chhungah lah ni se mi tam takin min lo bâwr a. Thusawi hnuah Lunglei lam pan turin Lawngtlai road lam aṭangin kan chhuak lehnghal bawk si a. Lunglei kan thlen leh hnuah Whatapps aṭangin he banner thlalak hi ka hmu ve chauh a ni. An banner târ hi kan hriatpui lo a, anmahni thua an lo târ a ni," a ti.

MNF President chuan, 'Chakma-te chu Chakma Vibrant Nation-ah ka siam dawn' tiin a sawi angin chief minister Lal Thanhawla'n a sawi tih sawiin, CM hawla thu sawi chu dâwt a nih thu a sawi a, "Ka thusawi zawng zawng kha video-a lak vek a ni a, chu chu en lêtin, he thu ka sawi hi a awm a nih chuan rawn phawrh turin ka phût a ni. CM ve meuh hi chuan a dikna lang leh nghal mai tur dâwt hi chu sawi sawi chîn loh a ṭha khawp mai," a ti.

Minister Zodintluanga'n, 'MNF-te chu mautâm hrin, mautam leh hnua ral leh mai tur' anga a sawi chungchang chhangin Zoramthanga chuan, "Mautàm aṭangin kum 10 chuang a ral leh tawh a, MNF chu a vul zual zel a, Pathian leh mipui zarah sorkar turin a inbuatsaih leh mek a ni," a ti a; Mizorama tualṭo party eng emaw zat ral tawh mah se, MNF erawh chuan hma lam an pan zel thu a sawi.

MNF President chuan Mara Autonomous District Council area-a V/C thlan chungchang sawiin, Saiha Assembly bial bikah MNF party chu opposition party ni chungin an chak zawk avangin lawmawm a tih thu a sawi a, "Palak constituency-ah kan che ṭha lo hle. He bial hi MNF-in candidate kan neih ngai lohna bial a ni a, kan thawhpui

ṭhin MDF bial char char ṭhin a nih avangin, kan tan chuan ramthim tluk a ni," a ti.