Retailer buhfai chungchang an sawiho

Central YMA chuan nimin khan Central YMA Hall-ah Aizawla retailer hrang hrangte ko khawmin, mipuiin ration buhfai bûk dik tak an dawn theih dan tur an sawipui a; retailer ṭhahnem tak an tel.

Inhmuh khawmna hi CYMA president Vanlal­ruata'n a kaihruai a; CYMA hruaitute'n inkoh khawm chhante an sawi bakah, retailer-te'n an hnathawh dan leh dinhmunte an sawi ve bawk.

Meeting-ah hian resolution an siam a; mipuiin ration buhfai bûk dik tak an dawn theih nan a ṭul anga thawhho an remti a, "Buhfai bûk dik sem a nih theih nana kawng dâltu leh thil dik lo titute a ṭul anga beihho zel kan remti," an ti.

Resolution chuan, "Sorkar kudam, Muanna Veng aṭanga buhfai lak chhuah dan hi en zui ngai niin hriat a ni a, bûk tling lo saa mipui chan tur lak chhuah a ni ṭhin hi ṭha kan ti lo a, chhui zui zel ni se," an ti a; Supply kudam aṭangin retailer-te'n buhfai bûk tling ngei an lâk chhuah theih nan leh mipuite hnenah bûk tling ngei sem a nih theih nan ṭan lakho zel an remti bawk a ni.