CADC inthlanpui neih a ni
Chakma Autonomous District Council (CADC) sorkar term 10-na atana inthlan chu nimin khan tluang taka neih a ni a, zing dar 7 aṭanga tlai dar 5 thleng vote thlak ṭan niin, he thuziah lai hian vote tla zat hriat theih a la ni lo.
Thu dawn danin, CADC inthlanah hian thil duhawm lo lian tham thleng hriat tur a awm lo a; Chawngte Police Station-a inthlan kaihhnawiha thil felhlel awm nia hriat report lut chinfel nghal a nih thu police thuneitute chuan an sawi.
CADC-ah hian MDC bial 20 a awm a, Fultuli bialah erawh chuan candidate-te chungchangah High Court-ah thubuai a awm mek avangin inthlan theih a ni lo. MDC bial 19-a polling station 66-ah inthlan vote thlak a ni. INC leh MNF-te'n bial awm zawng zawngah candidate an dah a, BJP-in bial 19 chuhin, independent candidate pasarih an awm.
Vote thlak hun a zawh veleh vote thlakna electronic voting machine (EVM)-te chu Chawngte-a SDO (Civil) office strong room-ah dah ṭhat turin lak nghal a ni a, EVM-te chu vawiin hian strong room a thlen kim theih beisei a ni. CADC inthlana vote tlate hi April 24, 2018 hian Chawngte-ah chhiar a ni ang.