World Tourism Day hman a ni

Nimin September 27 kha World Tourism Day a ni a, Vanapa Hall-ah hman niin, Tourism minister Robert Romawia Royte-in a hmanpui a, Thenzawl Golf Resort portal (website) a tlangzarh.

Robert Romawia Royte chuan, Covid-19 hripui avangin mimal, chhungkua, páwl leh kohhranin harsatna an tâwk nasa tih sawiin, "Sorkar tan pawh a buaithlak hle a, ngai kan awh hun tur a hriat loh. Khawvel pumah hripui vanga tuar nasa chu tourism leh a behchhan industry-te a ni," a ti a; Mizorama tourism sector behchhana ei zawngte pawhin an tawrh nasat thu a sawi.

A enkawl Tourism leh Sports & Youth Services department-te chu hripui tuar nasa an nih thu sawiin Robert Romawia chuan, "Chuti chungin heng department pahnih ruhrel, hall leh facility tam tak chu Covid-19 veite enkawlna hmun atan hman ṭangkai a ni a, harsatna karah chhanchhuah hna an thawh hlâwk hle a ni," a ti.

Tourism Minister chuan, tourism lamah Mizoramin hma a sawn theih nan sorkar a pawimawh ang bawkin mimal an pawimawh thu te, inpeizàwn chunga kal chuan nasa takin tourism ṭhanna tur a thlen theih thu te, Allocation of Business Rules 2019-ah hotel, restaurant leh homestay-te tourism hmalakna hnuaia dah a nih thu te, Chitea convention centre atan hmalak mek a nih thu leh heritage tourism lamah nasa taka hmalak a nih thute a sawi bawk.

Minister Robert Romawia hian Thenzawl Golf Resort portal (website) a tlangzarh a, Tourism Board vice chairman TC Pachhunga'n Standard Operating Procedures for Tourist Lodges/ Hotels a tlangzarh.

Tourism deputy director Dr R Lalrinchhani'n World Tourism Day thupui, ‘Tourism for inclusive growth’ a sawifiah a, Ek Bharat Shreshtha Bharat hman nghal a ni.

Inkhawmah hian Tourism department buatsaih 2nd Batch Tour Guide exam pass chhuak mi paruk hnenah certificate leh licence hlanna hun hman a nih bakah, World Tourism Day 2021 denchhena buatsaih videography leh sound tack competition-a ti ṭhate hnenah lawmman hlan a ni.