Mizo ta bik Thíngpui leh Thínglaidum
Mizorama sawhthing chi hnih - Thíngpui leh Thínglaidumte chu sorkar laipui hnuaia Department for Promotion of Industry and Internal Trade (DPIIT) chuan September 23, 2021 khan Mizo ta bik a ni tih chhinchhiahna Geographical Indication (GI) tag a pe.
Horticulture department hotute chuan Vanglaini palai zawhna chhángin, GI tag nei turin kum 2018 aṭanga an bawhzui tawh thu an sawi a, "GI tag nei tur hian a kawng a thui hle. Mizo sawhthing leh ram dang sawhthingte inan lohnate zir chian a nih bakah, GI tag min petute awmna Chennai-ah mahni ngei inlanin interview kan zu nei a ni," an ti a; GI tag pek a nih tak avangin an lawm thu an sawi.
Mizo sawhthing chi hnihte chu sawhthing chi dang aia an danglam thu sawiin Horticulture hotute chuan, "Thíngpui leh Thínglaidum gingerol leh volatile oil a sang bik. GI tag pek a nih hian an hlutna a sang lehzual a, dan hnuaiah Mizoram ta a ni tih chhinchhiah a nih tawh avangin state dang emaw, a duh duh tan emaw lo chìn pun leh lo hralh chhuah ve ngawt theih a ni tawh dawn lo," an ti a; GI tag-te buaipui dan tur ruahman a nih tur thu an sawi.
Thu dawn danin, DPIIT chuan Mizo sawhthing chi hnihte chu Mizo Ginger tiin GI tag a pe a, GI certificate chu kum 10 chhung a nung a, a hnuah tihnun (renew) leh theih a ni.
Thíngpui leh Thínglaidum ten GI tag a neih chungchangah hian chief minister Zoramthanga chuan loneitu a lawmpui thu Instagram-ah a tarlang a, "Hetiang dinhmun a thlen theihna tura an thiamna leh remhriatna thawhtu Horticulture department official zawng zawng chungah lawmthu ka sawi tak meuh meuh.
Kut hnathawka hêng thlai hmanga ei zawngtu tam takte'n hlâwk zawka an thlai tharte an hman zel ka beiseipui a, ka duhsakna sang ber ka hlan bawk e. Mizoram sorkar chuan Mizo mipui tan theihtawp a chhuah zel ang," a ti.