Hripui vangin MPSC-in hna a la khát; Combined competitive exam tum ṭhahnem

Mizoram Public Service Commission (MPSC) chuan Covid-19 léng avangin sorkar hna nghet tur an lâk mang loh thu an sawi. Hetih lai hian, MPSC-in Mizoram Civil Services (Combined Competitive) Examinations a buatsaih tur chu ṭum dang zawng aiin hmachhawn tum an tam.

Vanglaini palai zawhna chhángin MPSC secretary Lalhriatpuia chuan, Covid-19 léng vanga Mizoram sorkarin inrenchemna (austerity measure) a kalpui hnuah hna thar lâk an nei meuh lo tih a sawi a, "Kan hna lak ho hi chu Covid-19 awm hmaa tihfel vek tawh, Covid-19 vang vêka exam kan buatsaih lawk theih lohte a ni hlawm," a ti.

Lalhriatpuia chuan, Combined Com­petitive exam leh Fisheries department hnuaia UDC lak tur tih loh chu hna lak tur hmabak an nei rih lo tih sawiin, "UDC kan lak tur hi Mizoram Subordinate Services Selection Board din a nih hmaa tihfel tawh a ni," a ti a; departmental exam erawh chu a khát tâwka buatsaih tur a awm ṭhin thu a sawi.

MPSC Secretary sawi danin, Covid-19 lèn hnuah direct recruitment an kalpui mumal lo a; MPSC hnuaiah Covid-19 kaihhnawiha pawimawh doctor panga lak a nih bakah, Mizoramah ṭum eng emaw zat lìr a nghìn hnuah geologist pathum lak a ni.

November 24, 2021-a Civil Services (Combined Compe­titive) Examinations buatsaih turah application form thehlut mi 6,800 an awm a, chu'ng zinga 102 chu chhan hrang hrang vanga hnâwl niin, 6,698 pawm a ni. MPSC-in Combined Competitive exam a buatsaih hnuhnun ber kum 2018-ah chuan mi 2,257-in application form an thehlut a ni.

District thar pathum - Khawzawl, Saitual leh Hnahthial tih loh district dang zawngah Combined Competitive exam hi buatsaih a nih dawn thu sawiin MPSC Secretary chuan, "Exam hmachhawn tum an tam avang leh Covid-19 léng avangin exam-na hmun tur a ngai tam dawn hle. MZU, Higher & Technical Education leh School Education department-ah lehkha thawnin, an hmunhma ṭhate exam-na atana min hmantir turin kan ngen a ni," a ti.

MPSC-in November 24, 2021-a Civil Services (Combined Competitive) Exami­nations a buatsaih turah hian post 35 a awm a; post pakhat (Mizoram Civil Service) chu pianphunga rualbanlote tana dah a ni.

Service hrang hrang lâk zat tur chu - Mizoram Civil Service 15, Mizoram Police Service pariat, Mizoram Finance & Account Service pariat leh Mizoram Information Service pali a ni.