Mizoram puma sikul hawn a la hun rih loah ngaih a ni

Covid-19 léng avanga inkhuahkhirhna hrang hrang thlahdul tial tial zel ni mah se, Mizoram puma sikul kal tura order chhuah a la hun loa an la ngaih thu School Education minister Lalchhandama Ralte chuan a sawi.

Vanglaini palai zawhna chhángin Lal­chhan­dama Ralte chuan, village/local task force-te'n an khua/ venga sikul kal theih tawha an ngaih a, DC-te'n rem an tih chuan khawi hmunah pawh sikul kal theih reng a nih thu a sawi a, "Chutihrualin, kan boruak thlirin, sikul kal ngei ngei tawh tura intih erawh a la hun rih loah kan ngai. Boruak thlir chungin kan ngaihtuah zel ang," a ti.

School Education Minister chuan, sikulte tan calendar an neih sa vek thu sawiin, "Calendar kan siam sa ang hi hri léng karah fimkhur tak siin, sikul zawng zawngte'n zâwm thei vek se kan duh," a ti a; dinhmun a inan loh avangin online exam/unit test pawh ti vek tura order inpek chi a nih loh rualin, a theihna hmunah chuan buatsaih ngei ni se ṭha an tih thu a sawi.