Bru-te hnenah cheng nuai 4 leh a pung lak chhuahna tur certificate hlan a ni

Nimin khan Mamit DC Dr Lalrozama chuan DC conference hall-ah Tripura aṭanga Bru Mizorama rawn kirte hnenah sorkar laipuiin an tana a ruahmansak pawisa lak chhuahna tur 8th Batch Bru Repatriated Fix Deposit Certificate a hlan.

Dr Lalrozama chuan Tripura Bru refugee camp hrang hrang aṭanga Bru lo lette chu fix deposit bak sorkar aṭanga chhawmdawlna dawn a awm tawh dawn loh avangin, an pawisa dawnte chu ṭangkai tak leh dinchhuahpui ngei nan bakah mahni kutke a ding tura rilru fim tak nena hmang tura chahin, "In awmna khua ṭheuhah khua leh tui ṭha niin, rilru nghet tak pu chungin Mizoramah thlamuang takin awm ang che u," a ti.

An district chuan mawina riau an neih thu sawiin Mamit DC chuan, "Hnam hrang hrang chengte lungrual taka kan khawsak hona hi kan mawina a ni," a ti a, lungrual taka khawsak ho chu chhawmnun zel a pawimawh thu a sawi.

Certificate hi Tripura aṭanga an rawn let aṭanga chatlak miah lo a Mizorama kum thum chhung awm chhungkaw 13 an ni. 8th batch Bru repatriated-a hruaikirte hi an rawn let aṭanga kum hnih chhung thlatin Rs. 5000, free ration leh in sakna tur tanpuina Rs. 1,50,000 pek tawh an ni.

Kum thum an awm tlin chiahin Apex Bank-a fix deposit an dah lakchhuah theihna certificate pek an ni a, hemi hmang hian chhungkaw pakhatin cheng nuai 4 leh kum 3 chhunga a pung an la thei dawn a ni.