Chakna leh sum hmachhuan thei kan ni lo - ZPM Working President

ZPM party chuan nimin khan an pisaah an party zawm tharte lawm luh inkhawm an buatsaih a; ZPM working president K Sapdanga chuan thu sawiin, an party chu chakna leh sum leh pai hmachhuan thei an nih loh thu a sawi.

K Sapdanga chuan, an party-in hmabak ko tak an neih thu sawiin, "Kan hotupain min thihsan a, lú kan sûn a ni. Tuirial biala kan hotupa hmun ruak luah turin party hrang hrang kan intihsiak dawn. Kan hotupa a ni a, a sûlhnu chhui a, a hmabak chhunzawm kan duh hle. Pathian ráwn chungin kan hotupa sûlhnu chhui thei ngei turin theihtawp i chhuah ang u," a ti.

An hmachhawn turte chu ruling party, kum 20 chuang ruling party ni tawh leh sorkar laipuia sorkar laite an nih thu sawiin Sapdanga chuan, "Chakna leh thil tih theihna hmachhuan tur ni se, palina ni tur sa kan ni," a ti a; mipui thinlunga thawk ṭhin chu Tuirial bial mipui rilruah pawh thawkin, chakna an chan ngei an inbeisei thu a sawi.

K Sapdanga chuan, an party-a an lawm luh tharte'n hlut bikna danglam tak an neih thu sawiin, "Sorkar mek hian kum hnih leh thla li vel lai hun an la nei. A mawm lam bàwm lo a, a ro lam in bâwm hi a ropui kan ti a, kan ngaihlu. ZPM member leh unit pun dan hi mihring hnathawh vang niin kan hre lo. Party dang anga sum emaw, a mawm záwnga mi thlêm ve thei kan ni lo," a ti.

ZPM Working Presi­dent sawi danin, Covid-19 léng avanga hruaitute an zin chhuak thei lo chungin an party chuan undivided Aizawl district huam chhungah unit 736 leh block 55 an nei tawh a ni.

ZPM thuchhuah tarlan danin, an party vice president Rev. Dr K Thanzauva kaihhruai inkhawmah hian an party zawm thar mi 82 an lâwm lut a ni.