Sorkar department-ten RTI an ngaihthah

Mizoram sorkara department eng emaw zat chuan RTI Act hmanga zawhna an ngaihsak tâwk lo. RTI Act, 2005 ang chuan, RTI dan hmanga dilna hi SPIO-in ni 30 chhungin chhanna a pe tur a ni a; chutih laiin, tun hnaia Vanglaini-in RTI Act hmanga GAD-a information a dil chu dilna thehluh aṭanga thla li dáwnah an pe chhuak.

Vanglaini chuan Novem­ber 5, 2019 khan RTI Act hmangin General Administration Department (GAD)-ah dilna a thehlut a; sorkar department-te'n in (building) an neih dan te, department-te in luah zat leh a man chungchangte leh, kum 2014-2019 inkara sorkar department-te tana in sak zat leh thil dangte dil a ni.

GAD-a RTI Act hmanga dilna hi November 5, 2019-ah thehluh ni mah se, sorkar department hrang hrang hnenah a chhànna tur hriat a ngaih avangin December 5, 2019-ah GAD chuan department-te hnenah an thawn chhuak a; an thawn chhuah hun hi dilna an dawn aṭangin ni 30 a liam chiah tihna a ni.

Information dilna chu sorkar department-te'n a chhanna an thawn mai lo a, dil­tuin GAD-a a ngaihven ṭhin bakah, GAD pawhin hma an la zel a, December 12, 2019-ah diltu hnenah Interim Reply an thawn a ni. Interim Reply-ah chuan, chhanna a hunah pek theih a nih loh avanga pawi tih thu te, an bawhzui zel thu leh chhanna dawn kim hunah pek tur a nih thu a chuang.

GAD hotute chuan sorkar department ṭhenkhat, RTI Act hmanga zawhna chhanna ngaihsak lote hnenah an bawhzui zel niin an sawi a; January 10, 2020 khan sorkar department-te hnenah hriattir nawnna lehkha an thawn. Dilna thehluh aṭanga thla li leh a chanve vel hnu, March 18, 2020-ah chhanna chu GAD-in diltu hnenah an pe chhuak ta a ni.

Mizoram Information Commission (MIC)-in Right to Information Act, 2005 kaihhruaina a siamah chuan, RTI Act hmanga dilna chungchangah information pek hun chhung heti hian a tarlang a, "RTI Act, 2005 dan hnuaia fee pea information dil chu SPIO-in dilna a dawn 

aṭanga ni 30 chhungin chhanna a pe tur a ni. A huna chhanna pek theih loh chi a nih chuan a chhan ziakin diltu a hrilh tur a ni' {Section 7(1)} tih a chuang bawk.