State páwn aṭanga lutte kaihhruaina ; Vaccine la kim tan swab test a ngai lo

Mizoram páwn lamah Covid-19 vei an kiam tawh avangin Health & Family Welfare department chuan state páwn aṭanga Mizorama lutte entry point-a enfiah danah inkaihhruaina thar a tichhuak a, September 25, Inrinni khan hman ṭan a ni. Covid-19 vaccine la kim tawh, taksaa harsatna nei lote swab sample endik a ngai tawh lo.

HFW department chuan, ramri bul luhkáa screening kalpui dan siamṭhat a nih thu leh inkaihhruaina thar chu thu dang a awm leh hma chuan hman tur a nih thu a tarlang a, "Mizoram páwn hmun dangah Covid-19 kai an kiam tâk hle avangin state páwn aṭanga lo lutte entry point-a Covid-19 test/ screening kalpui dan chu uluk taka ennawn a ni," a ti.

Mizorama lut tur tana inkaihhruaina
1. Mizorama lutte chuan Home department thupek ding laite an zâwm vek ang a, an luhna entry point-ah rapid antigen test (RAT) hmanga endik an ni ang. RAT positive-te chu enkawl dan tur ding lai angin enkawl zui tur a ni.
2. Covid-19 negative-te chu sorkar/DC-in a ruat hmuna ni nga chhung khung hran (quarantine) an nih hnuah RT-PCR/TrueNat hmanga test leh tur a ni. An negative chuan khung hranna aṭangin an chhuak thei ang.
3. RAT negative-te'n symptom an neih chuan RT-PCR/TrueNat hmanga test leh thuai tur a ni a, an negative pawhin ni nga chhung khung hran a, RT-PCR/TrueNat hmanga test leh vek tho tur a ni.
4. Mizorama lutte chu Covid-19 symptom nei lo an nih chuan an luh hma darkar 72 chhunga RT-PCR/ TrueNat/ CBNAAT hmanga Covid-19 test negative report, SRF-ID dik tak awm chu screening point duty-te entir tur a ni a, entry point-a screening leh inkhung hran a ngai lo.
5. Covid-19 symptom nei lo, Covid-19 vaccine dose hnih la tawh leh dose hnihna an lak aṭanga ni 15 liam tawh tih tarlanna certificate (Cowin portal aṭanga download) emaw, Covid-19 hri kai dam leh, an dam aṭanga thla thum la ral lo, chumi tichiangtu atana discharge certificate-te screening point-a endik tura an neih chuan screening leh inkhung hran a ngai lo.
6. Screening leh quarantine ngai lote hian ni sarih chhung uluk takin Covid-19 léng kara khawsak dan tur zâwm chungin an hrisélna an inchîk ang.
7. Mizorama lutte'n eng certificate pawh keng mah se, symptom an neih chuan enkawl dan tur ding lai anga enkawl tur a ni.
8. Mizoram páwn aṭanga lut, mahni hriselna inchîk tura tihte chuan Covid-19 vanga harsatna awm thei chi hrang hrang - khawsik, rim hriatna hloh/tlahniam, hrawk thîp leh nuam lo, khuh, thaw-hah, taksa sil leh na ṭhém ṭhúm, pum ná, kawṭhalo, luhai, chaw ei tui lo leh chau ngawih ngawihte an neih chuan bialtu CMO/medical officer/helpline number - 102/0389-2323336/03892322336/03892318336-ah thuràwn lak tur.
9. Mahni hriselna inchîk tura tihte hian Covid-19 léng kara khawsak dan turte ṭha takin an zâwm reng tur a ni.