Covid-19 vangin mi 301 thi tawh

Nimin khan tlai dar 5 thlengin Covid-19 vangin mi paruk an thi a, an zingah nau hring hlim pakhat a tel. September 15, 2021-a thi tawh, Covid-19 vanga thi a nih thu nimina puan thar pakhat a awm bawk.

Sorkar chhinchhiah angin, nimin tlai dar 5 thleng khan Mizoramah Covid-19 vangin mi 301 an thi tawh a, September thla bikah mi 84 an thi tawh.

Pathianni zan zanlai pelh hnu, nimin zing dar 12:40 khan Lalhmahruaia (71), Kolasib Venglai East chu State Referral Hospital-ah a thi a; natna dang nei sa niin, Covid-19 vei a ni tih August 13-ah hmuh chhuah a ni a, August 17 aṭangin SRH-ah enkawl a ni.

Nimin zing dar 8:10 khan Laldanglovi (31) w/o Lalruatfela Hmar, Darlawn Venghlun chu SRH-ah a thi. Amah hi nau hrám tawh tak a pâi mek laiin September 16 khan Covid-19 vei a ni tih hmuh chhuah niin, September 17-ah SRH-ah dah luh a ni a, a nau pai chu ṭha taka zai chhuah a ni.

Lalhmunsanga (37), Hauruang, Lunglei district pawh nimin zing dar 8:30 khan hripui vangin Lunglei aṭanga SRH-ZMC panpui a nih laiin a thi. Thu dawn danin, Lalhmunsanga hi chawlhkar hnih vel liam ta aṭangin a khua a sik bakah harsatna dang a nei a, kar hmasa tir lama Christian Hospital, Serkawna a inentirnaa RAT hmanga a sample endikah a negative.

September 24-a damdawi-ina an kal leh hnuah a ziaawm theih loh avangin September 26, Pathianni khan Christian Hospital an pan leh a, a sample endik leh niin, Covid-19 positive a ni tih finfiah a ni. Lunglei College CCC-a awmtir phawt a nih hnuah oxygen a mamawh avangin Pathianni zanah Pûkpui DCHC-ah sawn a ni a; SRH-ZMC-ah thawn leh nghal niin, SRH thlenpui a nih hma deuhin a thi a ni.

Nimin chawhma dar 10:50 khan Nuhliri (82), Bawngkawn chu SRH-ah a thi a; hripui vei a ni tih September 19-ah hmuh chhuah niin, SRH-ah dah nghal a ni a, natna dang nei sa a ni. Lalvuani (88), Govt. Complex pawh nimin chawhma dar 11:30 khan SRH-ah a thi a; asthma nei niin, hripui vei a ni tih September 22-ah hmuh chhuah a ni a, SRH-ah enkawl nghal a ni. Amah hi chief minister Zoramthanga farnu a ni.

Nimin tlai dar 5 khan Joydeep Naskar (42), Chawnpui (Kolkata aṭanga rawn kal) chu hripui vangin SRH-ah a thi bawk a; natna dang nei sa, Covid-19 positive a ni tih August 30, 2021-a hmuh chhuah a nih thu sorkar thuchhuakin a tarlang.

Hetih lai hian, September 15, 2021-a thi Christina Lalhmingmawii (23), Bawngkawn chu Covid-19 vanga thi a nih thu nimin khan sorkar thuchhuakin a puang. Amah hi down syndrome nei a ni a, a damloh vanga September 14, 2021 zana Greenwood Hospital-a an inentirnaah Covid-19 a vei tih hmuh chhuah niin, a hnu lawk September 15 zing dar 3:20-ah a thi a ni.