KHAWTHLIR

Pisa kài hun
General Administration department chuan thlasik chhunga Mizoram sorkar pisa kai hun (office hour) tur nimin khan a tichhuak. October 4, 2021 aṭanga February 21, 2022 thlenga Mizoram chhung leh hmarchhak state danga Mizoram House-a pisa kai hun chu zing dar 9 aṭanga tlai dar 4 a ni dawn a, India ram khawpui danga Mizoram House-a pisa kai hun chu zing dar 9:30 aṭanga tlai dar 5 inkar a ni ang.

Thisen pe
KṬP, Kolasib New Diakkawn Branch chuan nimin khan thisen pek huaihawtin, Kolasib District Hospital Blood Bank tan thisen unit 15 an pe a, petute mipa 12 leh hmeichhia pathum an ni.

Minister-in Covid-19 a vei
Minister of state K Lalrinliana chuan Covid-19 a vei tih nimin khan hmuh chhuah a ni. Sorkar thuchhuah tarlan danin, K Lalrinliana hian Covid-19 symptom a nei a, ngaihtuahawm erawh a ni lo a; State Referral Hospital-ah enkawl tura ruahman a ni.

Lawmpuina hlan
Mizoram Govt. Departmental Officers Association chuan nimin khan IPR pisaah tun hnaia an member, officer kai sangte lawmpuina an hlan. Department 12 aṭangin officer 67 hnenah lawmpuina an hlan a, ṭum khata hlan tam ber a ni.

Electoral training
Champhaia Election office chuan nimin khan Electoral Roll ennawnna atana inpuahchahna atan Champhai khawpui leh a chhehvela booth level officer-te tan training an buatsaih a; application thar hman tur Garuda App leh Votter helpline apps hman dan leh ṭul dangte an inzirtir. Training hi Champhai, Hnahlan leh Khawbungahte neih leh tum a ni.