MNF-in sorkar hlawhchham chhanah Kohhran, NGO, adt. an puh tel - MPCC

Mizoram Pradesh Congress Committee (MPCC) chuan thuchhuah siamin, Covid-19 donaa MNF kaihhruai sorkar hlawhchhamzia mipuiin an tawn mek laiin, an rin lâwk ang ngeiin MNF pary-in an hlawhchhamna chhanah kohhran, tlawmngai pawlte leh khawtlang hruaitute an puh tel ve ta niin an tarlang.

MNF party-in September 25, Inrinnia press release an siamah, Covid-19 donaah Health minister Dr R Lalthangliana leh Medical Operation Team chairman Dr ZR Thiamsanga ten mimalin mawhphurhna an neih loh thu leh anni pahnih chauh dem chi a nih loh thu te, Covid donaah an pahnih ngaihdana hmalak a ni lo a, minister dang, kohhran, NGO, LC leh pawimawhna nei sorkar department aiawhte thutluknaa kal ṭhin a nih thute an tarlang a ni.

MPCC chuan, hripui donaa MNF party thil tum pakhat chu chiang takin a lang ta nia sawiin, "An hlawhchhamnaa dem an kai palh theih avangin invênna atan hripui donaah thutlukna pawimawh an siam dawn rêng rêngin kohhran hruaitu te, NGO hruaitute leh khawtlang hruaitute an hnûk lut lui tlat ṭhin a ni," an ti.

Mizoramin Covid-19 a donaah Mizoram mipui, kohhran, NGO hruaitute leh khawtlang hruaitute'n theihtawp an chhuah a, an tih tur bâk an ti deuh vek nia sawiin MPCC chuan, "Hri vei zinga tam zawk chu mipuiin sorkar ṭanpuina tel miah loin khawtlang enkawl 4C-ah kan enkawl dam a, law & order kenkawh thlengin mipui kan indap chawp. Chhuanchhama awmte pawh sorkar sum tel miah loin mipui thawh khawm hmangin kan inchhawmdawl vek bawk," an ti a; Mizoram sorkar erawh chuan a tih tur a ti lo nasa hle tih an sawi.

Congress party chuan, Mizoram sorkar chu RT-PCR laboratory din belh duh miah loah puhin, "Test-na rintlak tâwk lo RAT a ring lui ngat ngat a, hripui vei na zualte enkawlna tur covid dedicated hospital lah State Referral Hospital bâk a siam belh duh lo. Heng zawng zawng hi mipuiin kan tuar ta a ni," an ti.

MPCC chuan, Mizoram chu khawvela lockdown puang rei ber a ni chungin, mipui awm zat aṭanga chhûtin India rama Covid-19 vei thar tam berna state a nih tâk reng thu sawiin, "Mawhphurtu ber chu mipui ni loin MNF sorkar a ni. Health Minister leh MOT Chairman hi hriselna lam enkawltu ber, hripui donaa a khaipa ber an nih angin a mawhphurtu lian ber an ni bawk," an ti. Health Minister chu Chief Minister-in a thlâk lo reng a nih chuan Mizoram mipuiin nasa lehzualin an tuar zel dawn nia sawiin, an en liam mai mai dawn loh thu an sawi bawk.