Sumdawnna atan hnam dang hming hawhtir lo turin ngen

Mizoram Merchant Association (MIMA) bultuma Zarkawt Local Council, Dawrpui Local Council leh Panhnah leh Kuhva Zuar Association hruaitute nimina Zarkawt Recreation Centre-a ṭhukhawm chuan, sum­dawnna atan hnam dang hnenah hming hawhtir tawh lo turin Mizo mipui an ngen.

Ṭhutkhawmah hian, ram leilung fate'n sum­dawnna an tih ve theih reng thila hnam dangte'n Mizorama sumdawnna an thunun tlat chu ṭha an ti lo tih an sawi a, "Hnam dangte'n Mizo hming hawha sumdawnna an kalpui hi titawp tawh se, Mizote pawhin hming hawhtir tawh lo se. Chumi tur chuan nasa taka hmalakho ni se. Kan thurel anga hmalakna hi ram leh hnam hmangaihtute aṭang chuan dodaltu an awm loh kan beisei," an ti.

In luah tur neitute chu sumdawnna atan an inte hnam dang luahtir lo tur leh luah mekte pawh tih­tawpsak turin an ngen bawk.

MIMA thuchhuah tarlan danin, an hmalakna tur hian panhnah leh kuhva chauh a huam lo a, iron rod, cement, ei chawp leh bungraw supply thlengin a huam dawn ni.