Sept. 26-a Mizorama Covid-19 Vei hmuh thar 31.77% a tling

September 26, Pa­thianni khan Mizoramah swab sample 1,659 endik aṭangin Covid-19 vei mi 527 hmuh chhuah a ni a, positive percentage chu 31.77 a tling. Nimin khan hripui vei dam tawh mi 733 chhuahtir an ni a, mi paruk an thi.

Covid-19 vei hmuh tharte chu mipa 250 leh hmeichhia 277 an ni a, TrueNAT-PCR hmanga hmuh pahnih leh RAT hmanga hmuh 525 an ni. ZMC laboratory-ah leh Fluorescent Immunoassay (FIA) hmangin swab sample endik a ni lo.

IDSP record angin, Mizoramah Covid-19 vei 88,693 hmuh chhuah a ni tawh a, mipa 44,095 leh hmeichhia 44,598 an ni. Nimin tlai dar 5 thleng khan mi 73,646 (83.03%) chhuahtir an ni tawh a, mi 301 (0.34%) thi tawhin, enkawl mek mi 14,746 (17.91%) an awm. September 26, Pathiannia Covid-19 vei hmuh thar mi 527-te chu symptom nei 355 leh nei lo 172 an ni a; tualchhunga kái vek niin, hri an kàina chin hriat loh 310 an awm.

Hripui vei hmuh thar mi 527 zingah nausen kum khat tling lo pakua an awm a, an zinga pahnihin symptom an nei a, thla khat tling lo mi pahnih awmin, a naupang ber chu ni 4-a upa a ni. Kum 70 chung lam mi 22 aia tlem lo an awm a, an zinga mi 15 velin symtom an nei a, a upa ber chu kum 89 a ni.

Mizorama district 11 zingah Siaha, Khawzawl leh Hnahthial district-ahte sample endik a awm lo a; ZMC-ah leh FIA hmanga sample endik a awm loh bakah, TrueNAT hmang pawhin sample paruk (Aizawlah 2 leh Lungleiah 4) chiah a awm. Lawngtlai district-a sample 20 leh Saituala sample pakhat endik zawng zawng an positive vek.

ZMC laboratory leh FIA hmangin swab sample endik ni lo mah se, Mizoram chu hmarchhak state zingah Pathiannia Covid-19 positive hmuh thar tam berna a la ni zel tho a, hmarchhak state zingah hmuh tam berna a záwnin ni 35 a ni tawh. India ramah Mizoram aia hmuh thar tamna state pasarih a awm.

September thla ni 26 chhungin hripui vei mi 28,693 hmuh a ni tawh a, chawhrualin ni tin mi 1,103.58 hmuh chhuah an awm ziah ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 88,693 chu mi 1,000 zelah hripui vei mi 80 an awm ang a ni a; mi 1,00,000 zela Covid-19 vangin mi 26 an thi tawh ang a ni.

Nimin khan tlai dar 5 thlengin hripui vei dam tawh mi 733 chhuahtir an ni a; Aizawl district-ah mi 212, Serchhip district-ah 76, Mamit district-ah 70, Kolasib district-ah 54, Lawngtlai district-ah 35, Lunglei district-ah pakua, Champhai district-ah pasarih leh Hnahthial district-ah mi paruk an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh zinga mi 84,189 chu Mizoram chhunga kái chhâwng an ni a, mi 4,504 chu Mizoram páwn aṭanga an rawn luh hnua hmuh chhuah an ni.