Assam leh Mizoramin Ramriah thuthlukna an siam lo

April 21, Inrinni khan ramri chung­changah Ministry of Home Affairs-a joint secretary (NE) Satyendra Garg hoin Mizoram aiawhte leh Assam aiawhte Silchar Airport-ah an inbia a, thuthlukna an siam thei rih lo.

Meeting-ah hian Satyendra Garg chuan duh thlan tur pahnih a chhawp a; chungte chu - Survey of India-in constitutional boundary a siam aṭanga tehin, Assam leh Mizoram lam a hlat zawng inanga dan loa thil tih a awm leh awm loh endik leh, Inner Line Forest Reserve area sq.mile 509 huam chhunga dan loa thil tih a awm leh awm loh sorkar laipui endiktir a ni.

Mizoram team-te chuan Union Home Joint Secretary rawtna chu ramri khawih thil a nih avangin anmahni level-a thuthlukna siam thei an nih loh thu an sawi. Assam team lam chuan Home Joint Secretary rawtna siam chungchangah sawi an nei lo thung.

Satyendra Garg chuan, Mizoram team-te chu hotu sang zawk hnenah rawtna pahnih a siamte chu thlen a, April 24, 2018-ah a hnena an thuthlukna thlen leh turin a hrilh. Mizoram team-te hian vawiin hian an meeting thu hi Home secretary Lalnunmawia Chuaungo hnenah thlen an tum a ni.

Inbiaknaah hian Mizoram team hi conservator of forest Lalthlamuana Pachuau-in a ho a, 1st IR commandant HL Thlangzuala bakah, MZP hruaitute an tel.

Zawhna chhangin MZP president L Ramdinliana Renthlei chuan, Union Home Joint Secretary-in rawtna a siamte an pawm leh pawm loh chu an la ngaihtuah tur thu a sawi a, "Kan duh dana thil a kal lo a nih chuan MZP chuan Zofate Chawlhbuk sa turin hma kan la leh nghal dawn a ni," a ti.

Thu dawn danin, Survey of India-in constitutional boundary a siam hi Mizorama pawl hrang hrangte'n an duh loh 'Barh luih ramri' an lo tih ṭhin a ni a; hei vang hian MZP lam chuan Inrinnia inbiaknaah pawh thutlukna an siam duh lo a ni.

Tarlan tawh angin, Union Home joint secretary Satyendra Garg hoa Mizoram leh Assam aiawhte Zophaia March 27, 2018-a Zophaia inbia chuan ILFR sq.mile 509 chhunga dan loa thil tih a awm leh awm loh enfiah tur joint Committee an din a; anni hian dan loa thil tih a awm chuan a awm zui loh dan ngaihtuah turin thutlukna an siam a ni.

Meeting thurel ang hian Mizoram leh Assam aiawhte telna Joint Committee chuan dan loa thil tih a awm leh awm loh Zophai leh a chhehvela an endik tawh a; Phaisen lam leh Vairengte lama an endik leh tur chu endik ṭanna turah Assam leh Mizoram aiawhte thu a inhmuh loh avangin endik chhunzawm theih a ni lo. Hei vang hian Satyendra Garg hoin Inrinni khan inbiak leh a ni.