Kum 2017-18 chhungin MSHCS-ah mi 788-in Inenkawlna senso Rs. 4,46,22,520 an dil

Sorkar kum liam ta 2017-18 chhung khan Mizoram State Health Care Society (MSHCS) hnuaia inziak lut zingah phai lama inenkawl ngai mi 788 an awm a, chu'ng mi 788-te'n MSHCS-a inenkawlna senso an dil (claim) zat chu Rs. 4,46,22,520 a ni.

Cancer veite bik tana MSHCS-in sum a pek chhuah zawng zawng chu Rs. 3,34,19,431 a tling.

MSHCS hotute hnen aṭanga thu dawn danin, April 2017 - March 2018 chhunga MSHCS-a inziak lut zinga damlo, phai lama inenkawl ngai mi 788 zingah hian MR bill lêt thei mi 678 an awm a, MSHCS-in sum pek chhuah zat chu Rs. 3,49,63,201 a ni.

Phai lam damdawi-ina inenkawl dan mi 110-te chu MSHCS thawhpui damdawi-in palia inenkawl an ni a, chu'ng mite chu man chawi loin an awm a ni. Chutih rualin damdawi-in palite chuan MSHCS-ah damlote inentirna an bill leh a, an bill belhkhawm chu Rs. 96,63,319 a tling.

MSHCS hian phai lam damdawi-in pali - BM Birla Heart Research Centre, Medica Superspeciality leh Fortis (Kolkata vek)-te leh, GNRC, Guwahati-te nen MoU ziakin, damlote chu a thlawnin an inenkawl ṭhin a, Health Care Scheme rate-in an lo enkawl ṭhin a ni. MSHCS hotute chuan, Mizorama mimal damdawi-inte chu phai lama damdawi-in nena MoU an ziah ang hian ziahpui ve theih ni se chuan, mipui leh sorkar tan a ṭangkai hle tura an ngaih thu an sawi.

Hetih lai hian, kum 2017-18 chhungin cancer veite'n an inenkawlna bill ṭum 1,310 an thehlut a, chuta ṭanga MSHCS-in sum a pek chhuah zawng zawng chu Rs. 3,34,19,431 a tling.

Vanglaini-in a lo tarlan tawh, kum 2014-15 chhungin cancer veite'n an inekawlna ṭum 1,099 atan MSHCS-ah bill an thehlut a, MSHCS-in Rs. 2,56,09,621 a pe chhuak a ni. Cancer natna hian zual lam a pan zel tih a lang a; kum 2014-15 aiin kum 2017-18 ah bill 211-in a tam zawk a, sum senso pawh Rs. 78,09,810-in a tam zawk bawk.

MSHCS hotute chuan, Health Care Scheme-a inziak lut zingah Hepatitis-C veite enkawlna senso tihniam turin ṭan an la nasa tih an sawi a; tun hmaa damdawia chiu ngai chi chu thlakin, damdawi ei chi leh senso tlem zawk a nih theih nan tender an chhuah a, damdawi atana senso a tlakhniam phah nasa niin an sawi.

MSHCS hotute sawi danin, HCS hnuaia awm Hepatitis-C veite chuan Aizawl Civil Hospital-ah damdawi lehkha nen sum sêng loin damdawi an la a, damdawi dâwr lamin MSHCS-ah an bill leh ṭhin. Hei vang hian kum 2017-18 ah chuan Hepatitis-C vei pakhatin damdawi a bikima a eiin Rs. 24,000 chiah a sêng tawh a, a hma chuan Rs. 1,50,000 sen niin, mi pakhata senso a tlak­hniamna chu Rs. 1,26,000 a ni.

Rate hlui angin kum 2014-15 chhung khan MSHCS chuan Hepatitis-C vei mi 222 tan Rs. 3,52,70,171 an sêng a, kum 2017-18 chhung erawh chuan rate thar angin Hepatitis-C vei mi 397 tan Rs. 85,72,987 chiah an sêng. Kum 2014-15 aiin kum 2017-18 ah Hepatitis-C vei enkawl mi 176-in an tam zawk chungin, kum 2014-15 chhunga senso hmun lia ṭhena hmun khat vel chiah kum 2017-18 ah an sêng a ni.