Magnetic Mizoram Investors Summit-ah Cheng vbc. 2100 hû MoU ziah a ni

Magnetic Mizoram Investors Summit chu Inrinni khan Berawtlanga Tourist Convention Centre-ah chhunzawma zawh a ni. Summit ni hnihnaah hian Mizorama hna thawhna atan company pahnihte leh Mizoram sorkarin cheng vbc. 2,100 hû inremna thu­thlung, memorandum of un­derstanding (MoU) an ziak.

MoU-ah hian Mizoram aiawhin chief minister Lal Thanhawla'n hming a ziak a, MoU ziahpuite chu - Hospitality Doctor managing director Deepak Khera leh Sungevity Enterprises chairman Premjeet-te a ni.

Hospitality Doctor hian Mizorama hmalakna atan cheng vbc. 1,500 an bituk a, Sun­gevity Enterprise chuan solar plant dinna atan cheng vbc. 600 an ruahman bawk.

CM chuan, cheng vbc. 2100 hu MoU ziah a ni chu Investor Summit hlawhtlinna lantirtu a ni tih sawiin, Mizoram leh investor-te tan hmasawnna leh hlâwkna a thlen ve ve a beisei thu a sawi a, "Mizoramin hmasawnna kawng a zawh mek zel a, investing company-te tana ngaih pawimawh ber pakhat, inkalpawhna kawng pawh tichangtlung turin nasa taka hmalak mek zel a ni," a ti.

Hawla chuan, Summit hmang tura Mizoram chhung leh páwn aṭanga kal zawng zawngte chungah lawmthu a sawi a; Mizoram chu India leh Asia chhimchhak ramte nena insumdawn tawnna kawtchhuah a nih dawn avangin investor-te tan kawng a la inhawn zau zel tur thu a sawi bawk.

Planning minister Lalsawta pawhin thu sawiin, Mizoram sik leh sá nuam tak te, ṭhalai lehkha thiam an tamnate leh ram hmelhmang nuam, khualzin hîp thei ṭha tak tak a neihte chu hmasawnna atan theihna (potential) a nei tih tichiangtu a nih thu a sawi a, "Ramin hma a sawn dawn chuan leilung hausakna ai chuan inrêlbâwlna ṭha a pawimawh zawk a ni," a ti.

Summit khar ni hian panel discu­ssion neih niin, IIM-Calcutta-a mi Prof. CD Mitra-a'n a kaihruai a; Sungevity Enterprise chairman Premjeet, ICFAI vice chancellor Lt.Gen. AK Misra, Airtel CEO Raveendra Desai, Hospitality Doctor managing director Deepak Khera, Cloudsteer Technology, Singa­pore CEO Dhiraj Pratap leh IIM-Calcutta Innovation Park CEO Dr Subrangshu Sanyal ten thu an sawi.

Magnetic Mizoram Investors Summit hi Planning & Programme Implementation department bul­tumin Innovations India-in a buatsaih a ni.