Chief Minister-in IBSD-Mizoram a hawng

Mizorama Institute of Bioresources and Sustainable Development (IBSD) din thar chu April 20, Zirtawpni tlai khan chief minister Lal Thanhawla'n Nursery Vengah a hawng.

CM Lal Thanhawla chuan, IBSD chu Mizoram tan zirna ṭangkai tak a nih tura a ngaih thu leh Mizoram chhung leh páwna zirmite'n an hman ṭangkai a beisei thu a sawi a; IBSD hmalakna leh an centre-te hmang ṭangkaia researcher-te thawh rah chu Mizoram mai ni loin ram pum tana hmasawnna thlentu a nih tur thu a sawi.

Chief Minister chuan, Mizoram chu biodiversity hotspot a ni tih sawiin, "Heng a hausaknate hi zirchiang a, hmang ṭangkai a, state hmasawnna atan ngaihtuah a ṭul. Ramhmul damdawi hrang hrangte zirchian a nih theihna turin regional research institute din tumin ruahmanna siam mek a ni," a ti.

IBSD director Prof. Dinabandhu Sahoo chuan, IBSD Mizoram-in awmze nei leh thiam taka bio-resource ṭangkai zawka hman dan tur a ngaihtuah dawn a, chu chuan mi dang tan hna a siam dawn bakah, state ei leh bar tihhmasawnna a thlen dawn thu a sawi.

Prof. Dinabandhu Sahoo chuan, IBSD Mizoram chuan a bul ṭan nan Mizorama thlai ṭhenkhat – French bean, haracha leh mái bante hlâwk zawka thar a nih theih dan tur zir chian a, loneitute zirtir leh a hralhna tur zawnpui a tum thu a sawi a ni.

IBSD Mizoram-ah hian molecular laboratory, microscopy laboratory, bioinformatics laboratory leh plant tissue culture laboratory te a awm a; a tlawhtu researcher-te an innghahna tur lodging eng emawzat a awm bawk.

IBSD hi sorkar laipuia Ministry of Science and Technology-a Department of Technology hnuaia national institute a ni a, a hmunpui ber chu Manipur-ah a ni.

IBSD thil tum chu, India hmarchhak state-te chu bioresource (thing leh mau leh nungcha hman ṭangkai) hmanga khawtlang nun leh ei leh bar tihhmasawn a ni a; Manipur-ah centre pahnih awm tawhin, Sikkim leh Meghalaya-ah centre pakhat ve ve an din tawh a ni.