Lok Adalat-ah thubuai 167 chinfel a ni

Mizoram State Legal Services Authority (MSLSA) leh district-a Legal Services Authority-te chuan National Lok Adalat hun hmangin, an district ṭheuhah a ṭhu a; thubuai 286 ngaihtuahin, chu'ng zinga 167 chu an chingfel.

National Lok Adalat-a thubuai an ngaihtuahte chu - bank-a loan pûk rulh ṭhat loh chungchang te, BSNL bill bá te, mimal inkara leibá te, mimal leh chhungkaw inkara buaina te, ram inchuh thubuaite leh thubuai dangte a ni.

Lok Adalat-a thubuai ngaihtuah 286 zinga 167 chu chinfel a ni a, thubuai chinfel taka sum zat chu Rs. 1,48,76,728 a tling.

Thubuai lut zat erawh chu 760 a ni a, chu'ng zinga a tam ber chu BSNL thubuai niin, thubuai 400 a tling a, bank loan rulh ṭhat loh thubuai 280 a awm bawk.

Lok Adalat hi Mizoram State Legal Services Authority (MSLSA) chuan Lok Adalat hi an pisaah an nei a, Gauhati High Court judge, Justice Michael Zothankhuma'n a hmanpui. Michael Zothankhuma chuan, Lok Adalat chu India ramah ṭangkai taka hman a ni tih a sawi a, "Court lama thubuai inchiah rei lutuk tur rei lo têa chinfel nan te, thubuai neite'n inrem taka an thubuai an chinfel nante a ṭangkai hle a ni," ti.