German Consul General leh Larsap inkâwm

Kolkata-a German consul general Dr Michael Feiner chuan April 20, Zirtawpni zan khan Governor Lt.Gen. Nirbhay Sharma chu a chenna Raj Bhavan-ah a kâwm.

Dr Michael Feiner chuan, tun hnaiah India sorkarin hmarchhak biak tihmasawn turin hma nasa taka a la nia a hriat thu sawiin, chu hmalakna chu Mizoram tan ṭhenawm ramte mai ni lo, khawvel ram dang thlenga inphochhuahna remchanga hmang tura duh thu a sawi.

German Consul General chuan, Mizoram leilung awm dan chu khualzin mite hîpna atan a ṭhat thu sawiin, Mizo mipui pawhin rilru inhawng takin Mizoram danglam biknate zuar thiam se a duh thu a sawi a; hun tháwl zawk neia Mizoram rawn tlawh leh a, fan kual a tum thu a sawi bawk.

Governor Nirbhay Sharma chuan, Mizoram chu hun rei lo te chhungin nasa taka a danglam thu leh hma a sawn chak thu sawiin, "Tourism, horticulture leh food processing-ah hmasawnna tur tam tak a awm a, Mizoram hi a ngaihna hriate tan remchanna leina ram (land of opportunities) a ni," a ti.

Larsap chuan, India ram leh khawvel ram danga sumdawng liante chu Mizoramah kal se, investment tih nan a tlak a ni tih enfiah se a duh thu a sawi a; project hrang hrangah Germany sorkar leh company-te kaltlanga thawhhona ṭha an neih a duh thu a sawi bawk.