KHAWTHLIR

Earth Day hmang
Nimin April 22 kha Earth Day a ni a, he ni pual hian April 21, Inrinni khan Centre for Peace & Development (CPD) huaihawtin Mamit District Hospital-ah hun hman a ni. Earth Day pual hian Mamit Hospital tualah inkhawm a ni a, CPD enkawl home pathum - Buannel Children's Home (hmeichhia), Joshua Children's Home (mipa) leh Emau Adoption Egency-a thawktu leh naupangte an tel a; inkhawm zawhah damdawi-in leh a chhehvelte tifaiin an hnatlang a ni.

Thisen pe
ṬKP Coordination Committee, Aizawl chuan Inrinni khan BCM Aizawl West Kohhran hall-ah blood donation camp an huaihawt a, Aizawla BCM pastor bial pathuma ṬKP member-te'n Aizawl Civil Hospital tan thisen unit 173 an pe. Aizawl East bial aṭangin mi 54, Luangmual bial aṭangin mi 45 leh Zotlang bial aṭangin mi 74-in thisen an pe a ni.

Heroin man
Excise & Narcotics department-a Anti-Narcotics Squad chuan April 20, Zirtawpni khan Lalrinsanga (25), Myanmar lam mi hnen aṭangin Khatlaah heroin gram 96 an man a; tlaiah Ricky Lalchawia (32), Ramhlun South nia insawi hnen aṭangin heroin gram 11 anman bawk. Heroin neitute hi Narcotics Drugs & Psychotropic Substances Act, 1985 tlawhchhanin thubuai siamsak an ni.

Bial Inkhawmpui
Presbyterian kohhrana pastor bial hrang hrangte'n April 20, Zirtawpni zana Bial Inkhawmpui an ṭan chu nizan khan a ṭiak. Bial Inkhawmpuiah hian Inrinni khan nilengin rorel inkhawm neih a ni.

Valedictory service
Baptist Church of Mizoram hnuaia Pathian thu zirna, Academy of Integrated Christian Studies (AICS) chuan April 20, Zirtawpni khan Tanhrila an campus-a Pastor Thanzinga Chapel-ah zirlai zir chhuakte thlahna inkhawm vawi 16-na, Valedictory Service an hmang. Inkhawm hi principal Rev.Dr R Zolawma'n a kaihruai a, Senate of Serampore College-a dean Rev.Dr Limatula Longkumer-in thuchah a sawi. Zirlai thlahte hi mi 36 an ni.