Ramrikawna FCI kudam sawn a ni dawn - Rajya Sabha MP

State Consultative Committee on FCI chairman Ronald Sapa Tlau, Rajya Sabha MP chuan, Ramrikawna Food Corporation of India (FCI) kudam chu dawn a nih dawn thu leh Sairang ramah kudam thar sak a nih dawn thu a sawi.

Ronald Sapa Tlau hian nimin khan Hotel Regency-ah thuthar thehdarhtute a kâwm a; Ramikawna FCI kudam chu sawn chhuah an duhna a rei tawh tih sawiin, "Thil tih tak tak erawh a har hle. Theihtawp kan chhuah chung pawhin duh angin kan kal chak thei lo. Supply department-in Sairangah ram min pe a, tihfel ngaite kan tifel thawkhat tawh," a ti.

Rel chawlhhmun aṭanga buhfai hlânthlak phâkah kudam sak duh mah se, an duh ang ram an hmuh theih loh thu sawiin Ronald Sapa chuan, "Duh ang hmunah ram hmu lo mah ila, Supply department ram min pek pawh hi a ṭha a, kan lawm hle. Ram hi kum 99 chhung atan min pe a, kar lehah kan inhlan fel ang," a ti a; ram inhlan fel a nih hnuah kudam sak hna ṭan thuai a nih tur thu a sawi.

Ronald Sapa Tlau sawi danin, Mizoram chhunga FCI kudam parukah buhfai metric ton 12,045 chhêk khâwl mek a ni a, metric ton 8,000 lo thleng leh mai tur a awm a ni.

Rajya Sabha MP chuan, Supply department-in tun hma deuhin FCI dâwr loin supplier aṭanga buhfai an lei ṭhin thu sawiin, "A supply lamah harsatna an neih deuh avangin min dâwr leh tawh. Buhfai ṭha zawk leh man tláwm zawk an lei thei a nih chuan FCI chu Mizo kan nihna angin mipui tan a nih chuan pawi ka ti lo," a ti.

Buhfai an veng uluk tih sawiin Ronald Sapa Tlau chuan, "A hun takah random checking kan ti ṭhin. Buhfaite hi kudama a awm rei deuh tawh chuan a quality a tlahniam ve ṭhin a, a nih dan tur ang taka sawngbawl leh ṭhin a ni," a ti a; fûrpuiin a nan tak tak hmaa buhfai chhêk khawl turin theihtawp an chhuah thu a sawi bawk.