B.Ed Pre-Service Trained Association-te Dan loa zirtirtu lak cancel vangin lawm

Mizoram B.Ed Pre-Service Trained Association (MBPSTA) chuan thuchhuah siamin, Mizoram Education and Human Resources Development Department Recruitment Rules, 2015-in a phût angin, B.Ed degree neite chauh zirtirtu atan lak tur a nih laiin, tun hnaiah B.Ed zir chhuak lo eng emaw zat lak a nih thu an tarlang a; chutih rualin, sorkarin tun hnai vekah dan ang loa zirtirtu lak tawh a sût leh chu lawmawm an tih thu an sawi.

MBPSTA tarlan danin, Mizoram sorkarin adhoc aided H/S leh M/S enkawlna tura dan siam, December 19, 1997-a tihchhuah ‘Adhoc Recurring Grants-in-Aid for General Maintenance of Schools Rules,1997’ no. 3(xvi) leh no. 4(i)-in a sawi ang leh, National Council for Teacher Education Regulations, 2014-in zirtirtu atana minimum qualification a siam angin, Mizoram Education and Human Resources Development Department Recruitment Rules, 2004 chu Mizoram sorkarin a siam ṭha a, Mizoram Education and Human Resources Development Department Recruitment Rules, 2015 chu March 27, 2015-ah tihchhuah a ni.

Mizoram Education and Human Resources Development Department Recruitment Rules, 2015 ang chuan, H/S leh HSS zirtirtu atan recognised university aṭanga graduate/post graduate leh NCTE-in a pawmpui zirna-in aṭanga B.Ed degree neite chauh lak tur a ni.

MBPSTA chuan, tun hnaia dan bawhchhiaa zirtirtu lakte - Vanhne H/S (adhoc aided), Mualṭhuam South H/S leh Vaivakawn H/S atana zirtirtu lakte sorkarin a cancel leh chu lawmawm an tih thu an sawi a, "Chutih rualin, Chanmari West H/S (adhoc aided)-a dan loa Science teacher lak hi a rang thei ang bera cancel turin thuneitute kan ngen a ni," an ti.

MBPSTA chuan, tun hnuah dan loa zirtirtu lak thleng tawh lo se an duh thu sawiin, "Hna diltute zinga qualified-te aṭangin interview ko ṭha leh vat turin thuneitute kan ngèn a ni," an ti a; sorkar sikul leh sorkar ṭanpuina dawng sikul (adhoc aided)-a zirtirtu lakna reng rengah dan ang taka advertisement chhuah tur leh a tling (qualified) dilna chauh pawm tur leh la turin School Managing Board leh thuneitute an ngen a ni.

IASE-a B.Ed Multimode Programme 2015 aṭanga kalpui mek chu sorkar H/S leh HSS-a zirtirtu ni mek, kum 2015 hma lama lut, B.Ed la train lo tana buatsaih a nih laiin, sorkar H/S leh HSS (RMSA)-a zirtirtu ni lo leh kum 2015 hnu lama zirtirtu atana lakte B.Ed training tir an la awm reng chu mak an tih thu sawiin MBPSTA chuan, "IASE leh MZU aṭangin B.Ed regular-a train chhuak kum tin mi 200 chuang an awm tawh dawn avangin, dan bawhchhiaa zirtirtu lakna remchanga hman ṭhin B.Ed Multimode Programme hi a rang thei ang bera titawp turin Mizoram sorkar leh MZU thuneitute kan ngen a ni," an ti.

MBPSTA chuan, RMSA hnuaia zirtirtu lak turah pawh danin a phût angin, qualified teacher chauh la turin thuneitute an ngen tih an tarlang bawk.