Kan sorkar chuan hmasawnna hna nasa takin kan thawk ang - Zoramthanga

Kolasib Block MNF chuan nimin khan Kolasib Diakkawn YMA Hall-ah mi thar lawm luhna inkhawm an buatsaih a; an hun hmanpuitu MNF president Zoramthanga chuan, an sorkar chuan hmasawnna hna nasa taka an thawh tur thu a sawi.

Zoramthanga chuan, Congress sorkarin budget peipun tum loin an kang puak a, an ei zo vek nia sawiin, "Mipuiin sum kan harsa a, kawng tinrengah hmasawnna a chhuṭi a ni. Vaiin contract hna lian zawng zawng an thawk a, hnatlanga kawng chhe siamte chu mipuiin kan tih turah kan ngai hial tawh. MNF kan sorkar chuan sum tam tak hai chhuah tur awmte hmangin hmasawnna hna nasa takin kan thawk leh dawn a ni," a ti.

MNF President chuan, Congress sorkar hnuaiah sum a tam tual tual chungin, mipui chan a tlem tial tial nia sawiin, "Zoram mipui hian Congress sorkartir an tum tawh lo. NLUP púrchawa Congress-a awm zawng zawngte pawh Mizo hnam leh ram inpui MNF-ah i haw khawm tawh ang u," a ti a; sorkarna an siam chuan SEDP hnuaiah Rs. 3,00,000 aia tlem lo an sem dawn thu a sawi.

Chhungkaw pakhatin a bul ṭan aṭanga eizawnna tling khawpa hma a lak theih nan Rs. 3,00,000 tal a ngai tih an hriat thu sawiin Zoramthanga chuan, "Congress sorkarin sing bi tê têa awmze nei tham loa NLUP a kalpui ang hian kan ti ve dawn lo. A taka thawk lo leh hma la lote tan erawh SEDP-ah beisei tur a awm lo. Mizoramah ram chuangtlai hman ṭangkai loh tam tak a awm a, MNF-in sorkarna kan siam chuan heng ram ṭha tak tak hman ṭangkai lohte hi hman ṭangkai a nih theih nan link road tam tham tak laih a ni dawn," a ti.

MNF President chuan, 'Khawia pawisa nge in neih ang,' tih zawhna a awm tih a hriat thu sawiin, "Kan sorkar hmasak khan Mizoram budget pawtpéng miah loin Assam Rifle ûm chhuakin Capital Complex kan din thei a, Millennium Centre te, Ch.Chhunga Bus Terminal te, Ch.Saprawnga Truck Terminal te, Durtlang kawng te, Lunglei kawngte leh a dang tam tak kan siam thei. India sorkar hian budget bakah sum hman tur hi a dah hnem lutuk," a ti a; Mizoram sorkar chu sum hai chhuak thiam loah a puh.

MNF thuchhuah chuan, Kolasib-a inkhawmah hian MNF President hian Congress party aṭangin voter 1,107, ZNP aṭangin voter 69, MPC aṭangin voter 31, BJP aṭangin voter 35, neutral aṭangin voter 203, an vaiin voter 1,445 a lawm lut niin a tarlang.