Serchhipah vawk thi leh damlo enfiah

Sorkar laipuia mithiamte'n nimin khan Serchhip khawpuia vawk thi leh damlote an enfiah. Serchhipah hian Porcine Reproductive and Respiratory Syndrome (PRRS) leh Classical Swin Fever (CSF) vangin vawk eng emaw zat a thi tawh a, damlo mek eng emaw zat a awm bawk nia thu dawn a ni.

Serchhipa vawk endiktute hi sorkar laipuia assistant commissioner Dr HR Khanna leh National Institute of High Security Animal Diseases (NIHSAD), Bhopal-a principal scientist Dr Raju Kumar te an ni a; Mizorama AH&Vety department aṭangin Disease Investigation Wing-a mi Dr Robert Rualthankhuma, Dr Esther

Lalzoliani leh Dr Neihthangpuii ten an ṭawiawm.

Mithiamte hian Serchhipah hian PRRS leh CSF vang nia hriata vawk damlo mek leh thi tawhte an endik a, laboratory-a endik turin an thisente an la a ni.

Serchhipa AH&Vety mite'n tun hnaiah Serchhip district-a vawk damlo 53 thisen an la tawh a, laboratory-ah an enfiahtir tawh a ni. Vawk thisen sample an lak 53 zinga 31 chuan PRRS hri a kai bakah, a dang 11 chuan CSF hrik a kai tih finfiah a ni.

Tun hnaia vawk hri lêng vang hian Serchhip district-ah vawk notê 142 leh a puitling 101, a vaiin vawk 243 a thih tawh. Serchhip district-ah vêk hian kum 2016 khan PRRS leh CSF a lêng chiam tawh a, chumi ṭum chuan vawk 510 an thi a ni.