KHAWTHLIR

Aizawl Civil Hospital (ACH) Medical Superintendent chuan thuchhuah siamin, inkharkhip khauh zawka kalpui a nih avang leh hripui hi nasa taka darh thei dinhmunah kan awm mek avangin ACH-ah damlo loh theih lohte chauh inentir hrih turin a hriattir a, "Hei hi hri darh zêl tur laka mipui leh thawktute him theih nana tih a ni a, zawm hram hram turin mitin kan ngen a ni," a ti. Inkharkhip chhung hian specialist doctor-te phone leh WhatsApp hmangin an duty hun 

chhungah rawn theih an ni.

Lunglei district High Powered Committee vice chairman Lawmawma Tochhawng, MLA chuan June 8, Thawhṭanni khan Phairuanga sangha khawina hmun a tlawh a, Rotlang West khaw dáia Major lui khuah a, Mizoram sangha pangngaite khawina tura tih hmun a tlawh bawk. Phairuang khuaa sangha khawina hmunah hian sangha dil chhâwng thuma siam turin ruahman a ni.

Serchhip Dinthar Branch KṬP chuan nimin khan Serchhip District Hospital blood bank-ah thisen pek rûnpui an nei a; an member mipa 17 leh hmeichhia pasarihte'n thisen unit 24 an pe.

Mizoram sorkara secretary-te zinga mi 20 chuan May thla hlawh aṭangin Chief Minister's Relief Fund-ah sum eng emaw zat an thawh a, an thawh zat belhkhawm chu Rs. 4,36,105 a ni. Sorkar thuchhuah tarlan danin, nimin chawhnu dar 4 thlenga CM Relief Fund-ah secretary 20-te bakah pawl/kohhran/sorkar department pangain sum an thawh a, sum thawh belhkhawm chu Rs. 7,51,105 a ni.

Lawngtlai district-a Mizoram leh Myanmar inrìnaa inkalpawhna hmun pawimawh - Fungsihchuah (Saisihchhuah)-a duty mek H Lalvenmawii (18) d/o H Kapliana Sangau-I chu sikserh leh thinlian vangin nimin chhun dar 1 khan Sangau damdawi-inah a thi. H Lalvenmawii thih chungchangah hian ZPM chuan thuchhuah siamin, pawi an tih thu leh a chhungte an tawrhpui thu an tarlang a, Mizoram sorkarin a chhungte dinchhuahpui tham tur sumin ral ngei se an duh thu an tarlang.