Border trade atan ram nei tawh

Commerce & Industries department chuan Kawrpuichhuah Border Trade dinna turin ram bigha 224.99 an nei tawh a; sorkar laipui duh dan angin, Integrated Check Post (ICP) dinna atan bigha 224.99 aṭang hian bigha 52.21 chu Ministry of Home Affairs Secretary hmingin kum 2010 khan dah a ni.

Commerce & Industries department hotute hnen aṭanga thu dawn danin, Union Minister of State for Home Affairs-in May 27, 2015-a Kawrpuichhuah a tlawh ṭumin department-in ram a neihna hmun chu Thega lui aṭanga a hlat deuh avangin lei dawhna tur bul hnaiah ICP tur atan ram lo ruahman turin a hriattir a ni.

Ram acre 10.05 chu lei awmna tur bulah ruahman a ni tawh a, chu ram chhungah chuan periodic patta nei an awm avangin sorkarin a neih let theih dan tur a buaipui mek a ni. Thega luia lei dawhna tur pawh Mizoram official leh Bangladesh official-te'n July 2017 khan an enho a, lei dawhna hmun tak tur pawh tihfel a ni tawh. Lei dawhna tur DPR chu Mizoram PWD-in an buaipui mek a ni.