Home Minister hoin inhmukhawm Covid-19 flying squad ruat belh rél
Nimina kalpui ṭan Lockdown 6.0 kaihhruaina khauh taka kalpui dan tur ngaihtuahin nimin khan Home minister Lalchamliana hoin Chief Secretary conference hall-ah sorkar hotute an ṭhukhawm. Páwna chhuah tlem chungchang veng tin local task force-te vantlang aurinnaa autir leh duty-na hmun hrang hrangah police flying squad ruat belh an rél.
Meeting-ah hian, páwna chhuah tlem chungchang veng tinah au a nih theih nan Aizawl District Magistrate-in thupek chhuah se, an ti a; duty-na hmun hrang hrangah police flying squad ruat belh an pawm. Aizawl Civil Hospital thlanga damdawi zawrhna huam chhungah damdawi leh mamawh dang leite'n dan anga hmai an tuam dan leh social distancing an zawm ṭhat dan endiktu bik police dah belh ni se, an ti.
Chhuah phalna (pass) pek chungchangah, an awmna task force chairman-in ṭul a tih angin lehkha ziahsak se, chhiatna, thihna leh dam lohna bikah lo chuan pass pek mai mai ni lo se, an ti a; hmun danga hna thawk leh feh tura chhuakte pawhin an awmna veng task force chairman aṭanga phalna la zel turin an rél. Dawr kawtah leh sumdawnna hmunah dawr neitute'n social distance marking an siam leh siam loh endik turin police duty ruat belh ni se, siam lo chu pawisa chawitir ni se, an ni bawk.
Meeting-ah hian chief secretary Lalnunmawia Chuaungo, Home secretary Lalbiaksangi, IGP(HQ) John Neihlaia, IGP (LO) LH Shanliana leh hotu dangte an tel a ni.
Meeting thurel dangte
# AMC area, district headquarters leh containment area-a mamawh lei tura chhuak turte'n an awmna task force chairman phalna lehkha an keng tur a ni a, phalna nei loa chhuakte chu The Mizoram (Containment and Prevention of Covid-19) Ordinance, 2020 Chapter-II(9) angin pawisa chawitir zel a ni ang.
# Police duty-te'n mimal lirthei tlân chhuakte uluk takin phalna an neih leh neih loh an endik zel ang.
# Identity card nei nazawngin chhuah an tum ṭhin avangin, sorkar pisa kaite pawh office identity card leh detailment order, softcopy/hardcopy an keng tur a ni a, inmil lo a awm chuan dan (Ordinance) tlawhchhanin police duty-te'n pawisa an chawitir dawn.
# 'COVID-19 on Duty’ tih poster târ mimal lirtheite an páwngpaw chhuah loh nan uluk taka endik tur a ni.
# Feh turte chu zing dar 4:30 - 7:00 inkarah an awmna veng an chhuahsan tur a ni a, tlai dar 5-7 inkarah an inah an awm leh hman tur a ni.