October 30-ah Tuirial AC by-election ; Political party 4-in candidate neih an tum
Election Commission of India (ECI) chuan nimin khan Tuirial Assembly constituency by-election hun atan October 30, 2021 ruat a nih thu a puang. Hriat theih chinah by-election hi political party paliin chuh an tum a, party pahnihin candidate tur an puang tawh.
ECI chuan nimin khan state hrang hranga MP constituency pathum leh MLA constituency 30-a by-election neih hun tur a puang a, vote thlak ní atan October 30, 2021 ruat a ni. Tuirial Assembly by-election pawh October 30-ah neih tur a ni a; chuh tumte tan October 8 thleng nomination thehluh theih niin, November 2, 2021-ah vote chhiar a ni ang.
Hriat theih chinah Tuirial biala by-election hi Bharatiya Janata Party (BJP), Indian National Congress (INC), Mizo National Front (MNF) leh Zoram Peoples' Movement (ZPM)-te'n chuh an tum a; INC leh MNF chuan candidate tur an puang tawh a, ZPM pawhin candidate tur an puang ṭêp tawh nia thu dawn a ni.
Kum 2018-a Assembly inthlanpuiah khan Tuirial bialah hian voter 17,003 an awm a, mi 14,245-in vote an thlak. Independent (ZPM) candidate Andrew H Thangliana chuan 4,387 vote hmuin thlan tlin a ni. Andrew H Thangliana hi August 17, 2021 khan a thi a, hei vang hian Tuirial bialah hian by-election neih a ngai ta a ni.