Sept 27-a India rama Covid-19 positive hmuh tamna ber dawttu Mizoram

September 27, Thawhṭannia India rama Covid-19 vei hmuh chhuah tharah Mizoram chu state 28 leh union territory pariat zinga Kerala dawta hripui vei hmuh chhuah tamna ber a ni a; hmarchhak state zingah hmuh tamna ber niin, a zawnin ni 36 chhung hmuh tamna ber a ni tawh.

Covid-19 vei Thawh­ṭannia hmuh chhuah zat sorkar laipuiin nimin zing lama a tarlan danin, hmuh chhuah tamna ber Kerala-ah mi 11,699 hmuh a ni a, mi 1,846 hmuh chhuahna Mizoramin a dawt a, Tamil Nadu (1,657) chu pathumna a ni. Hetih lai hian, hun rei tak chhung Kerala dawta hmuh tamna ber ni reng tawh Maharashtra-a hmuh chhuah thar zat tarlan a ni lo.

Maharashtra tel loin hripui vei September 27-a hmuh chhuah zat chu mi 18,795 an ni a, chu'ng zinga mi 1,846 chu Mizorama mi niin, hmuh zawng zawng aṭangin 9.82% a tling. Hmuh tamna ber Kerala-a hmuh zat 11,699 chu 62.25% a ni thung.

Nimin zing lam khan Mizoramah hripui vei enkawl mek (active case) 15,843 an awm a, Mizoram aia active case tamna state pathum - Kerala, Maha­rashtra leh Tamil Nadu-te chiah a awm. Covid-19 positive hmuh tawh zawng zawng aṭanga enkawl mek percentage-ah Mizoram a sang fál zel a, 17.50% a ni a; Mizoram dawttu chu Kerala (3.40%) a ni.

India hmarchhak state bikah chuan Mizoram chu hripui vei hmuh thar tamna ber a ni chhun­zawm zel a, ni 36 chhung hmuh tamna ber a ni tawh nia thu dawn a ni.

September 27, Thawhṭanni khan hmarchhak state pariatah Covid-19 positive mi 2,586 hmuh chhuah a ni a, chu'ng zinga mi 1,846 chu Mizorama hmuhte niin, 71.38% a tling. Hmarchhak state dang pasarihah mi 740 hmuh chhuah a ni a, state pasariha hmuh zat aiin Mizoramna hmuh zat 1,106-in a tam zawk.

Covid-19 vei enkawl mek zat pawh Mizoramah a tam fál a, hmarchhak state pariatah enkawl mek mi 25,914 awmin, chu'ng zinga 15,843 (61.14%) chu Mizorama mite niin, state dang pasariha active case belh khawm chu 10,071 a ni a; NE state dang pasariha active case aiin Mizoram bika active case 5,772-in a tam zawk a ni.

Nimin zinga report tihchhuahah, Covid-19 vanga thi Mizoramah mi pasarih an awm belh a, Assam-ah mi pariat an awm. Meghalaya-ah mi pathum, Manipur, Sikkim leh Nagaland-ah mi pakhat ṭheuh an thi a; Arunachal Pradesh leh Tripura-ah thi an awm lo.