Vawk hri avanga harsatna tâwkte Central tel lo pawha pui turin ngen

Mizoram Pradesh Youth Congress Committee (MPYCC) chuan Mizoram sorkar chu sorkar laipui puihna hmang chauha Mizorama vawk pûl hri tuartute puih tumah an puh a; sorkar laipui puihna tel lo pawha vawk hri avanga harsatna tâwkte pui turin Mizoram sorkar an ngen.

MPYCC chuan, African Swine Fever (ASF) vanga vawk suat neitute hnena zangnadawmna pek tur chu sorkar laipui aṭanga chhànna a awm loh avangin Mizoram sorkarin vawk suat a titawp rih tih an sawi a, "Sorkar laipui puihna chauha vawk hri nasa taka tuartute puih tum hi a dik lo kan ti a, sorkar laipui puihna tel kher lo pawhin vawk hri vanga a tuartute hi pui turin Mizoram sorkar kan ngen a ni," an ti.

Congress ṭhalaite chuan, "Mizoram sorkar hian an duhna lamah chuan financial rules bawhchhiaa Lengpui Airport pawh nasa taka an siamṭhat theih chuan, vawk vulhtute'n ASF vanga an neih zawng zawng an chânna hi ngaihthah suh se," an ti a; vawk vulhtute'n nasa taka harsatna an tawh laia Mizoram state budget aṭanga chhawmdawlna an pe duh lo leh an tihsak duh lo chu an dem thu an tarlang.

MPYCC tarlan danin, July 31, 2021 thlengin Mizoram sorkarin sorkar laipuia vawk suat neitu mi 5,977 tan zangnadawmna a dilsak a, chhànna hmuh a la ni lo. Kumin August-October chhungin vawk 48,939 suat tura ruahman a ni a, mahse, vawk suat chu tihtawp rih a ni.

Congress ṭhalaite chuan, September 27, 2021 thlengin vawk pûl hri vangin vawk 28,458 a thi tawh a, ASF vangin vawk 10,297 suat a ni tawh tih an tarlang bawk.