By-election hun Inrinni a nih avangin vote thlak hun siam rem rawt dawn

Kolasib district election officer (DEO) Dr H Lalthlangliana, bawrhsap chuan nimin khan DC conference hall-ah thuthar thehdarhtute kâwmin, an district chhunga Tuirial Assembly by-election neih tur a sawifiah a; vote thlak hun tura tih October 30, 2021 chu Inrinni a nih avangin vote thlak hun siam rem turin Election Commission of India (ECI)-ah rawtna an thlen dawn tih a sawi.

Dr H Lalthlangliana chuan, "Vote thlak ní, October 30, 2021 hi Inrinni a nih avangin kohhran ṭhenkhat tan vote thlak hun chhung siam rem a ngai dawn. Chumi tur chuan ECI hnenah rawtna thlen a ni ang," a ti.

Tuirial bial huam chhung bikah inthlanna kaihhnawih thilte zawh vek a nih hma chuan village task force chairman mawhphurhna chu khua/venga YMA branch ṭheuhin an lak rih tur thu sawiin Kolasib DEO chuan, hri léng kara inthlan tur a nih angin, ECI-in zawm tur hrang hrang a siamte ngai pawimawha zâwm hram turin mipui a chah.

Kolasib DC chuan, an district-ah hripui vei pun danin kiam lam a pan hret hreta a lan thu sawiin, "September 9, 2021 aṭanga hri kai pun dan chawhrual chu 6.7 a ni. VLTF, executive duty leh mipuite inthlahdah loa ṭan lak chhunzawm zel a ṭul. Election duty turte pawh Covid vaccine la tawh chauh ruat tura ruahman a ni a, la lo an awm a nih pawhin la hman turin ruahmanna siam a ni ang," a ti.

January 1, 2021 thlenga chhin­chhiah dan chuan, Tuirial bialah polling station 26 leh voter 17,905 an awm a, mipa 8,818 leh hmeichhia 9,087 an ni.