Eptu ni chungin mi thar kan nei zel - ZPM Working President

ZPM working president K Sapdanga chuan, an party chu opposition an ni chungin mi thar duhawm tak tak an nei zel tih a sawi a, "Hêng kan unau tharte hi duat taka lo chhawmdawl a, lo enkawl an ngai dawn a ni," a ti.

Mamit Central Block ZPM-te'n nimina inkawm khawmna an buatsaih a hmanpuinaah K Sapdanga chuan, "Kan hma lawkah by-election kan hmachhawn dawn. Kan tan a pawimawh em em a, party dang tan chuan election a ni a, keini tan erawh chuan lusûnna hmun a ni. Kan MLA mual min liamsan ta Pu Andrew-a hnung zui zo ngei turin hna kan thawh a ngai a, a huphurhawm em em a ni," a ti a; ṭawngṭainaah inhriat reng a pawimawh thu a sawi.

ZPM Working President chuan, an party-ah member tinin tih theih tâwk an neih ṭheuh thu sawiin, "Keimahni awmna zelah theihtawpa ṭan lo lak ve hi kan mawhphurhna a ni," a ti.

ZPM thuchhuah tarlan danin, Mamit Central Block ZPM president C Lalawmpuia kaihhruai inkawmhonaah hian central block huam chhung aṭangin mi 42-in ZPM an zawm thar a ni.