Covid-19 vangin mi 303 thi tawh

Nimin khan tlai dar 5 thlengin Covid-19 vangin mi pakhat a thi a, Thawhṭanni zinga thi, nimina puanzar thar mi pakhat a awm bawk.

Sorkar chhinchhiah angin, nimin tlai dar 5 thleng khan Mizoramah Covid-19 vangin mi 303 an thi tawh a, September thla bikah mi 86 an thi tawh.

H Lalrawna (67), Hnahthial Electric Veng chu September 27, Thawhṭanni zing dar 4 khan Covid-19 vangin a khawsak mekna Hlimen, Aizawlah a thi. H Lalrawna hi ina thi a ni a, a thih hnuah Rapid Antigen Test hmanga a swab sample endiknaah Covid-19 positive a ni tih hmuh a ni.

Nimin zing dar 5 khan Chawnghmingthangi (84), Lunglei Bazar Veng chu hripui vangin Lungleia Sikulpui CCC-ah a thi a, hripui vanga thi 303-na a ni. Covid-19 positive a ni tih September 25 khan hmuh chhuah a ni a, CCC-ah dah luh nghal a nih thu sorkar thuchhuakin a tarlang.