Mizoramah Covid-19 vei hmuh chhuah tam ber ni a thleng leh

September 27, Thawhṭanni khan Mizo­ramah swab sample 9,494 endik aṭangin Covid-19 vei 1,846 hmuh chhuah a ni a; hripui vei hmuh tam ber ní niin, India ramah Kerala dawta hmuh thar tam berna a ni. Nimin khan hripui vei dam tawh mi 588 chhuahtir an ni a, mi pakhat a thi.

Covid-19 vei hmuh tharte chu mipa 859 leh hmeichhia 987 an ni a; ZMC laboratory-a hmuh chhuah 473, TrueNAT hmanga hmuh 80, RAT hmanga hmuh 1,271 leh Fluorescent Immu­noassay (FIA) hmanga hmuh 22 an ni.

IDSP record angin, Mizoramah Covid-19 vei 90,539 hmuh chhuah a ni tawh a, mipa 44,954 leh hmeichhia 45,585 an ni. Nimin tlai dar 5 thleng khan mi 74,982 (82.82%) chhuahtir an ni tawh a, mi 303 (0.33%) thi tawhin, enkawl mek mi 15,254 (16.85%) an awm.

September 27, Thawhṭannia Covid-19 vei hmuh thar mi 1,846-te chu symptom nei 995 leh nei lo 851 an ni a; tualchhunga kái mi 1,842 leh tun hnaia state pawn aṭanga rawn lut mi pali niin, tualchhunga kái zingah hri an kàina chin hriat loh 692 an awm.

Hripui vei hmuh thar mi 1,846 zingah nausen kum khat tling lo 20 an awm a, an zingah symptom nei an awm nual a, a naupang ber chu ni 13-a upa a ni. Kum 70 chung lam mi 50 chuang an awm a, an zinga mi 25 velin symptom an nei a, kum 90 tling tawh mi pahnih awmin, pakhat zawkin symptom a nei.

September thla ni 27 chhungin hripui vei mi 30,539 hmuh a ni tawh a, chawhrualin ni tin mi 1,131.07 hmuh chhuah an awm ziah ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 90,539 chu mi 1,000 zelah hripui vei mi 82 an awm ang a ni a; mi 1,00,000 zela Covid-19 vangin mi 27 an thi tawh ang a ni.

Nimin khan tlai dar 5 thlengin hripui vei dam tawh mi 588 chhuahtir an ni a; Aizawl district-ah mi 417, Serchhip district-ah 60, Lawngtlai district-ah 52, Kolasib district-ah 31, Mamit district-ah 17, Saitual district-ah panga, Champhai district-ah pali leh, Lunglei leh Khawzawl district-ah pakhat ve ve an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh 90,539 zinga mi 86,031 chu Mizoram chhunga kái chhâwng an ni a, mi 4,508 chu Mizoram páwn aṭanga an rawn luh hnua hmuh chhuah an ni.