Faina Hapta hman dan tur sawiho a ni

Urban Development & Poverty Alleviation (UDPA) director H Lianzela kaihhruaiin nimin khan UDPA hotute chuan Azadi Ka Amrit Mahotsav leh Faina Hapta vawi 45-na hman dan tur an sawiho a; faina leh hmasawnna tura mi tin mawhphurhnate zirtirna tam zawk pe turin chanchinbumite an sáwm.

Azadi Ka Amrit Mahotsav hi India ramin zalenna a hmuh champha kum 75-na puala hmalakna a ni a, Faina Hapta chu October 2-8, 2021 chhungin hman a ni ang.

India ram khawpui fai endikna lian ber Swachh Survekshan 2022 inpuahchahna atan kumin October 2 aṭanga November 30 chhungin UDPA chuan khawpui fai leh thianghlim thlanna atan endikna an buatsaih leh dawn a; Mizorama khua 28 (urban town)-ah faina kawnga hmalakna, a bikin páwna inthiar awm lohna (Open Defecation Free Plus), bawlhhlawh thliar hran, plastic vawi khat hman chi (single use plastic) hman tlem/tihtlem leh vantlang inthiarna vawn thianghlimte endik a ni ang.