Sûlhnu chhuinaah ni hnih chin chauh en lêt tawh tur

Covid-19 veite sûlhnu chhuina (contact tracing) chungchangah Health & Family Welfare (HFW) department chuan nimin khan inkaihhruaina thar a tichhuak a, hman nghal a ni. Contact tracing-ah ni hnih chin chauh en lêt tawh tura tih a ni.

Inkaihhruaina thar ang chuan, Covid-19 vei symptom neite chu symptom an neih ní aṭanga chhiar leta ni hnih chhung leh, symptom nei lote chu sample lak ni aṭanga chhiar leta ni hnih chhunga hri kai nena metre hnih (ft. 6) huam chhunga invênna tel loa minute 15 aia rei awmho chinte chauh positive contact-ah telh tawh tur a ni.

Covid-19 positive contact tracing-ah hian Covid-19 veite nena inhnaihte chu hlâwm thum - primary high risk contact, primary low-risk contact leh secondary contact-ah ṭhen a ni a; chu'ng mite swab sample endik leh inkhung hran dan tur pawh tihchhuah nghal a ni.

Primary High Risk Contact
(Inhnaih taka awm, hri kai ngei tura ngaih theihte)
1. Hripui vei khâk, thisen, luak, chil, zun, êk, adt. kut lâwnga khawih leh invênna hmang loa Covid-19 veiin a khuh/hahchhiau khum.
2. PPE hmang loa Covid-19 vei taksa khawih (eg. chibai).
3. Darkar 24 ral hmaa sanitiser, kutsil, glove, adt. hmang lo/inveng zui loa hripui vei thawmhnaw, mutbu, bungbel, adt. khawih.
4. Covid-19 vei nena in khata khawsa.
5. Invênna hmang loa Covid-19 vei nen metre hnih (ft. 6) aia inhnaiha awmho.
6. Covid-19 vei nen metre hnih (ft. 6) aia inhnaiha lirthei/thlawhna, adt.-a chuanho.
7. Covid-19 veite'n puipunna hmun an tlawh a nih chuan chumi hmuna invênna hmang loa thawktu, Covid-19 veite hnaihtu leh invênna hmang loa awm vete.

Primary Low-Risk Contact
(Inhnaih ve tho, hri kai mai tura ngaih ni lote)
1. Hmun khata Covid-19 vei nen meter hnih (ft. 6) aia inhlata minute 15 aia rei awmho.
2. Metre hnih (ft.6) aia inhlata lirthei/thlawhnaa chuanho.
3. Hripui vei nen minute 15 aia rei inhnaih ve satliah.

Secondary Contact
Covid-19 vei nena inhnaih ni lo, invênna hmang loa primary high risk contact nena metre hnih (ft.6) aia inhnaiha minute 15 aia rei awmhote leh an chenpuite.

Sûlhnu chhuinaa swab test
 Primary high risk contact chu rinhlelh a nih aṭanga test result chhuah thleng khung hran tur a ni a, hripui vei nen an inhnaih ni hnuhnung ber aṭanga ni 5-10 inkarah RT-PCR/Truenat hmangin swab test tur. Test hun pangngai a thlen hmaa symptom nei chu a rang thei ang berin RAT hmanga test tur a ni a, a negative chuan RT-PCR/TrueNat hmanga test leh nghal tur.

 Rokhawlhna eng emaw avanga RT-PCR/TrueNat test theih loh, symptom nei lote chu ni 14 ral hnuah test loa chhuah zalen theih a ni.

 Primary low risk contact leh secondary contact-te chu symptom an nei a nih loh chuan inkhung leh sample lak a ngai lo; an hnaih primary high risk contact-te an positive erawh chuan RT-PCR/TrueNat hmanga test ve nghal tur.

 Covid-19 vei dam tawhte chu thla thum chhung an taksaah Coronavirus them a awm thei a, chu chu PCR test-ah virus nung lai anga a hmuh theih avangin symptom an nei a nih loh chuan primary high risk contact-ah an awm a nih pawhin thla thum chhung chu swab test rih loh tur a ni a; symptom an nei a nih pawhin doctor-te ráwn chunga test tur a ni.