CADC inthlana vote tlate chhiar a ni ; Tling zat - MNF - 8; INC - 6; BJP - 5

April 20, 2018-a Chak­ma Autonomous District Council (CADC) inthlanpui vawi 10-naa vote tlate chu nimin khan Chawngte SDO (Civil) office-ah chhiar a ni a; inthlanna bial 19 aṭangin Mizo National Front (MNF)-in seat 8, Indian Na­tio­nal Congress (INC)-in seat 6 leh Bharatia Janata Party (BJP)-in seat 5 an la.

CADC inthlanah hian vote thlakna atan electro­nic voting machine (EVM) hman a ni a, vote tlate chu SDO(C) pisaa counting hall pahnihah chhiar a ni. Returning officer N Chakhai, Lawngtlai DC chuan MDC bial tina vote hmu sang berte chu MDC ni tura an tlin thu a puang zel a ni.

CADC-ah hian MDC bial 20 a awm a, Fultuli bialah erawh chuan candidate pakhat hnâwl a nih vanga High Court-a zualko an awm avangin, Gauhati High Court chuan a 'stay' rih a, inthlanna neih theih a ni lo. Fultuli bial tih loh MDC bial 19-a polling station 66-ah inthlanna neih a ni a, voter 29,444 zinga mi 27,038-in vote thlakin, vote 91.83% a tla a ni.

Tun ṭum inthlana inhnehna sang ber chu Parva bialah niin, INC candidate Mohan chuan amah hnaih bertu BJP candidate Prityrup Chakma chu vote 314-in a hneh a; inhnehna tlem ber chu Mondirasora bialah niin, INC candidate Onish Moy Chakma-in amah hnaih bertu BJP candidate Lokhi Dhan Chakma chu vote 6-in a hneh.

MDC atan hmeichhia pakhat a tling a, BJP candidate Kusum Lota Chakma chu Borapansury-II bialah thlan tlin a ni. CADC inthlanpui vawi 10-naah hian inthlanpui vawi 9-naa MDC zinga mi 17 an ding nawn leh a, mahse, paruk chiah an tling nawn a; tling thar mi 13 an awm a ni.