Aizawlah Edufest 2018 ṭan a ni

Zalen chanchinbu leh Lynchpin-te chuan nimin aṭang khan Assembly Annexe building-ah Edu­fest vawi 16-na an buat­saih ṭan a, MJA president Zonunsanga Khiangte-in a hawng.

Zonunsanga Khiangte chuan, Edufest vawi 16-na buatsaih a ni leh ta chu lawmawm a tih thu sawiin, Edufest kaltlangin zirlai tam takin senso tlem zawkin zirna ṭha tak takah seat an hmuh phah tawh tih a sawi a; tun ṭuma Edufest pawh zirlaite'n an chhawr ṭang­kai ngei a beisei thu sawiin, "Hlawhtling taka zirlaite'n an hman theih nan duhsakna ka hlan a ni," a ti.

Edufest-ah hian In­dia ram chhung leh ram páwna zirna-in hrang hrangte'n stall an hawng a, Singapore aṭang­in institution pahnih leh Canada aṭangin in­stitution pakhat an tel.

Bank pahnih - Mizoram Cooperative Apex Bank leh Mizoram Rural Bank-te'n stall an hawng bawk a; stall awm zawng zawng chu 18 a ni.

Edufest 2018 hi vawi­inah chhunzawm a ni dawn a, chawhma dar 11 aṭanga tlai dar 5 thleng tlawh theih a ni ang.