KHAWTHLIR

Heroin man
Central YMA hnuaia ruihhlo dotu, Supply Reduction Service (SRS) duty-te chuan nimin khan Lalrinfela (30), Durtlang Leitan Ramthar Veng nia insawi hnen aṭangin heroin hawng 10 an man a, Excise & Narcotics department kutah hlan. Heroin an man hlut zawng hi Rs. 3,50,000 a ni.

NLUP sem
Agriculture department chuan, nimin khan Sihphir Venghlun YMA Hall-ah Aizawl East-I biala Sihphir, Sihphir Venghlun leh Nausêl khuaa NLUP dawngtu mi 90 hnenah ṭanpuina a sem a, bialtu MLA R Lalrinawma'n a hmanpui. Ṭanpuina hi mi 90 hnenah Rs. 39,60,000 sem ral a ni.

Tlân theih
Traffic SP chuan thupek chhuahin, Ramhlun North leh Bawngkawn South, Industry pêng leh Bawngkawn inkar kawngpui siamṭhat hna thawh zawh a nih tak avangin lirtheite chu tlan dan pangngaiina tlan theih tawh.

Earth Day
Champhai Nature Conservancy (CNC) leh Champhai College (GCC) ṭangkawp buatsaihin, April 23, Thawhlehni khan Champhai College-ah World Earth Day, 2018 hman a ni a, thupui chu ‘End plastic pollution’ tih a ni. World Earth Day hi kum 1970 aṭanga hman ṭan a ni a, he ni pual hian essay leh drawing hmanga inlena buatsaih a ni.

Dawr hawng
Kolasib District Hospital-ah nimin khan man tláwm zawka mipuite'n damdawi an lei theih­na tur damdawi dawr 'Jan Aushadhi Kendra Store' chu Health minister Lal Thanzara'n a hawng a, dawr hawn taka zawrh damdawi-te chu quality ṭha niin, man tlawm zawka zawrh a nih vangin mi harsa zawkte tan a ṭangkai thu a sawi. Jan-Aushadi Store hi tun dinhmunah Mizo­ramah pakua a awm a, district hospital zawng zawnga hawng turin ruahmanna kalpui mek a ni.