Kolasib-ah NCD Screening Mela buatsaih

Nimin khan Kolasib Diakkawn YMA Hall-ah cancer leh natna chi hrang hrang inkai chhâwn thei loh, non-communicable diseases (NCD) Screening Mela buatsaih a ni a, Health minister Lal Thanzara'n a hawng.

Lal Thanzara chuan, Mizoram chu India ramah mihring aṭanga chhûtin cancer tamna state tia hriat lâr a nih thu a sawi a, "A bik takin pumpui cancer, chuap cancer, chaw dáwt cancer, chhùl hmawr cancer-ahte kan sang hle. Sorkar pawhin hei hi hriain, theihtawpin cancer hmuh chhuah leh enkawlna lamah hma a la a ni," a ti.

Health Minister chuan, Zemabawka Mizoram State Cancer Institute tihchangtlun nan sorkar­in project a siam chu sorkar laipuiin a pawm a, Tertiary Care Cancer Centre (TCCC)-a hlan kai nan cheng vbc. 44.27 a pawmsak thu sawiin, "Hemi aṭang hian inhemna khawl ṭha chi Linear Accelerator bakah, Brachytherapy-te leh khawl dang dang lei tum a ni," a ti a; cancer ward pawh khum siam belh zel tum a nih thu a sawi.

Minister Lal Thanzara tarlan danin, National Health Mission (NHM) hnuaiah cancer leh natna benvawn dang - lung ná, thisen sáng, zunthlum, stroke-te buaipuitu pawimawh tak, National Programme for Prevention & Control of Cancer, Diabetes, Cardiovascular Diseases & Stroke (NPCDCS) kaltlangin Population Based NCD Screening kalpui mek a ni.

NCD Screening programme hnuaiah hian kum 30 chin chung lam zawng zawng chu cancer chi thum - chhùl hmáwr cancer, hnute cancer, ka chhung cancer bakah, zunthlum leh thisen sang an vei leh vei loh en chhuah vek tum a ni. Hei hian a tum chu, insawisel miah loin heng natnate hi a vei rûk theih a, an vei a nih chuan a rang thei ang bera hmuh chhuah a, taksa a khawih pawi hmaa enkawlna pek vat a ni.

Cancer leh NCD natna dang­te vei lo tur chuan nun danin a zir a ngai tih sawiin Lal Thanzara chuan, "Zûk leh hmuama fihlîm te, ei leh ina fimkhur te, taksa insawizawi tamte a pawimawh. Kan lo vei palh a nih pawhin, hriat chhuah vat a nih theih nan inentir uar a pawimawh," a ti.

NCD Screening Mela-ah hian cricketer lar tak ni ṭhin cancer natna hnehtu Arun Lal, Miss Mizoram 2018 T Ramthanmawii, Femina Miss India Mizoram 2018 Lily Darnei, footballer Jeje Lalpekhlua leh doctor-te'n cancer leh NCD natna dangte laka fihlim turin nunphung hrisel zûk leh hmuama fihlim, ei leh ina fimkhur leh taksa insawizawi tam chungchangahte an sawi a ni.